Rusiya Federasiyası Azərbaycanın Moskvadakı səfiri Rəhman Mustafayevi Xarici İşlər Nazirliyinə çağırıb. Bu barədə məlumatı Rusiya mediası yayıb.

Məlumatda qeyd olunur ki, səfirin XİN-ə çağırılmasına səbəb Azərbaycan tərəfinin “qeyri-dost hərəkətləri” olub. Rusiya tərəfi həmin hərəkətlərin hansı addımları əhatə etdiyini dəqiqləşdirməsə də, bu hadisə son günlər iki ölkə arasında gərginləşən münasibətlər fonunda baş verib.

Xatırladaq ki, bundan əvvəl “Sputnik Azərbaycan”ın Bakı ofisində polis əməliyyatı keçirilib. Rusiya dövlətinə məxsus olan bu media qurumunun fəaliyyəti Azərbaycanın müvafiq orqanları tərəfindən məhdudlaşdırılıb və nümayəndəliyin akkreditasiyası ləğv edilib. Rəsmi Bakı bu qərarı informasiya təhlükəsizliyi və qanunvericiliyin tələbləri ilə əsaslandırıb.

Moskvada isə bu addım narazılıqla qarşılanıb və Rusiya rəsmiləri bunu ikitərəfli münasibətlərə zidd hesab ediblər.

Rusiya XİN-də keçirilən görüşdə səfir Rəhman Mustafayevə narahatlıq ifadə olunub və bu cür addımların “müttəfiqlik ruhuna uyğun gəlmədiyi” bildirilib.

Azərbaycan tərəfi hələlik məsələ ilə bağlı rəsmi açıqlama verməyib.