Çinin Tiencin şəhərində Azərbaycanın Birinci vitse-prezidenti Mehriban Əliyeva ilə Ermənistanın Baş naziri Nikol Paşinyanın həyat yoldaşı Anna Akopyan arasında keçirilən görüş Cənubi Qafqazda davamlı sülh, sabitlik və qarşılıqlı etimadın qurulması baxımından mühüm hadisə kimi qiymətləndirilir.

Milli Məclisin deputatı Hikmət Babaoğlu bildirib ki, Mehriban Əliyeva istər Birinci vitse-prezident, istərsə də Heydər Əliyev Fondunun rəhbəri kimi fəaliyyəti ilə ölkə hüdudlarından kənarda humanitar və sülh missiyasını davam etdirib, təbii fəlakət yaşayan ölkələrdə məktəblərin tikintisinə, humanitar yardımların təşkili və mədəni irsin dünyaya tanıdılmasına xüsusi töhfə verib.

Deputat qeyd edib ki, 44 günlük Vətən müharibəsi dövründə Azərbaycanın cəsarəti ilə yanaşı humanist dəyərləri də ön plana çıxıb və Mehriban Əliyevanın siyasi obrazı ölkənin siyasi sisteminə mühüm töhfədir. Babaoğlunun sözlərinə görə, Azərbaycanın irəli sürdüyü şərtlər əsasında Vaşinqtonda sülh sazişi paraflanıb və bundan sonra atılacaq addımlarda da Mehriban Əliyevanın fəallığı gözlənilir.

Şanxay Əməkdaşlıq Təşkilatının tədbiri çərçivəsində baş tutan görüşdə Anna Akopyanın dialoq təşəbbüsünü Mehriban Əliyevanın qəbul etməsi “sülhə gedən yolda rəmzi addım” kimi dəyərləndirilir. Deputatın fikrincə, birgə çəkilən fotolar da regionda sülh təşəbbüslərinin davamlılığını göstərir.