Rusiya Xarici İşlər Nazirliyinin sözçüsü Mariya Zaxarova Azərbaycanda saxlanılan 13 Rusiya vətəndaşının azadlığa buraxılmasının Moskva ilə Bakı arasında münasibətlərin yaxşılaşması üçün mühüm addım ola biləcəyini bildirib.

Onun sözlərinə görə, məsələ avqustun 22-də Həştərxanda keçirilən Rusiya–Azərbaycan hökumətlərarası komissiyasının iclasında geniş müzakirə olunub və Moskvanın mövqeyi Azərbaycan tərəfinə çatdırılıb.

Zaxarova qeyd edib ki, Rusiya konsulluq əməkdaşları iyul ayında Bakı İstintaq Təcridxanasında həbsdə olan vətəndaşlarla üç dəfə görüşüb, dördüncü görüş üçün müraciət edilib, lakin hələ cavab verilməyib. O əlavə edib ki, iyunun 2-də Rusiya tərəfi saxlanılanların sağlamlıq durumu və tibbi yardım barədə məlumat istəyib, lakin cavab almayıb.

Gərginliyin fonu
İyunun 27-də Yekaterinburqda azərbaycanlıların saxlanılması iki ölkə arasında münasibətləri gərginləşdirib. Rusiya İstintaq Komitəsi onların əvvəlki illərdə qətl və sui-qəsd cinayətlərində ittiham olunduğunu açıqlayıb. Saxlanılanlardan ikisi – Ziyəddin və Hüseyn Səfərov qardaşlarının vəfat etdiyi, onların amansızlıqla qətlə yetirildiyi bildirilib.

Hadisədən sonra, iyunun 30-da Azərbaycan Daxili İşlər Nazirliyi fəaliyyəti dayandırılmış “Sputnik Azərbaycan” redaksiyasında əməliyyat keçirib, nəticədə 13 nəfər saxlanılıb. Onlardan bir neçəsinə qarşı həbs qətimkan tədbiri seçilib.

Diplomatik mübahisə
Daha sonra Moskva Bakıda saxlanılan jurnalistlərə görə, Bakı isə Yekaterinburqda azərbaycanlıların tutulmasına görə bir-birinə qarşı nota təqdim edib.