Avropa İttifaqının (Aİ) Avropa Şurasındakı nümayəndəliyi avqustun 8-də Vaşinqtonda Azərbaycan və Ermənistan arasında əldə olunmuş razılaşmanı alqışlayıb. İttifaq bu sənədi iki ölkə arasında münasibətlərin tam normallaşmasına aparan “əlamətdar irəliləyiş” kimi qiymətləndirib.

Aİ-nin məlumatında razılaşdırılmış addımların vaxtında icra olunmasının, sülh sazişinin imzalanıb ratifikasiya edilməsinin vacibliyi vurğulanıb:
“Ötən mart ayında Azərbaycan və Ermənistan arasında ikitərəfli danışıqların yekunlaşmasından sonra bu saziş iki ölkə arasında münasibətlərin tam normallaşması istiqamətində mühüm addımdır. Bu, 1991-ci il Almatı Bəyannaməsinə uyğun olaraq suverenlik və ərazi bütövlüyünün qarşılıqlı tanınması prinsiplərinə əsaslanır. Avropa İttifaqı Ermənistan və Azərbaycan arasında normallaşma prosesini dəstəkləməkdə davam edir.”

Bəyanata Aİ ilə yanaşı, aşağıdakı 15 ölkə də qoşulub: Albaniya, Andorra, Bosniya və Herseqovina, Gürcüstan, İslandiya, Lixtenşteyn, Monako, Moldova, Monteneqro, Norveç, Şimali Makedoniya, San Marino, Serbiya, Ukrayna və Böyük Britaniya.

Bu addım regionda sülh prosesinə dəstəyin artdığını və tərəflər arasında razılaşmaların beynəlxalq səviyyədə diqqətlə izlənildiyini göstərir.