Böyük Britaniya Rusiyanın Ukraynaya qarşı müharibəsi ilə bağlı daha bir azərbaycanlıya sanksiya tətbiq edib.

Sentyabrın 12-də Britaniya hökumətinin saytında dərc olunan 100 yeni sanksiya paketinin məqsədi Rusiya prezidenti Vladimir Putinin “gəlir mənbələrini məhdudlaşdırmaq”dır.

Sanksiyalar Rusiya neftini daşıyan 70-dən çox gəmi, eləcə də Rusiya ordusunun təchizatına kömək edən 27 şirkət və 3 şəxsə qarşı tətbiq olunub. Həmin şəxslər arasında Türkiyədə yerləşən “Mastel Makina” şirkətinin azərbaycanlı direktoru Şanlıq Şükürov da var. Digər iki nəfər isə Çindəki “Shenzhen Blue Hat” şirkətinin rusiyalı sahibləri Elena Malitsikaya və Aleksey Malitskidir.

Rəsmi açıqlamaya görə, bu şirkətlərin istehsal etdiyi elektronik avadanlıqlar Rusiyanın “İsgəndər” və “X-101” raketlərində, həmçinin Ukraynada geniş istifadə olunan dronlarda tətbiq olunur.

Elə həmin gün Kiyevdə Ukrayna prezidenti Volodimir Zelenski ilə görüşən Britaniya xarici işlər naziri İvet Kuper bildirib:

“Sanksiyalar Rusiyaya qarşı iqtisadi təzyiqi artırmaq və onun qanunsuz müharibəni maliyyələşdirmək üçün həyati əhəmiyyətli pul axınlarını kəsmək məqsədi daşıyır. Bu, Ukraynada ədalətli və davamlı sülh üçün atılan növbəti addımdır”.

Yeni sanksiyalar Rusiya ilə əməkdaşlıq edən Çin, Hindistan, Türkiyə və Tailand şirkətlərini də əhatə edir. Onlara qarşı aktivlərin dondurulması və səyahət qadağaları tətbiq olunacaq.

Qeyd edək ki, bu, Britaniyanın azərbaycanlılara qarşı ilk sanksiyası deyil. Bu ilin mayında Rusiya enerji sektorunda çalışan bir neçə şirkət və beş azərbaycanlı sanksiya siyahısına salınmışdı.