1 noyabr 2025-ci ildən etibarən Ermənistan dövlət sərhədini keçid zamanı vurulan möhürlərdə artıq Ararat dağının təsviri olmayacaq. Yeni möhürlərdə yalnız “Armenia” və “Հայաստան” yazıları, sərhəd-keçid məntəqəsinin adı, tarix və həmin məntəqənin tipi — hava limanı, dəmir yolu və ya avtomobil keçidi göstəriləcək.

Ararat dağı Ermənistanın milli simvollarından hesab olunur və ölkənin gerbində də əksini tapıb. Lakin dağ 1921-ci il Moskva müqaviləsinə əsasən Türkiyə ərazisində — keçmiş İrəvan quberniyasının Sürməli qəzasında yerləşir.

Dəyişikliklər Ermənistanla Türkiyə arasında münasibətlərin normallaşdırılması istiqamətində atılan addımlar fonunda nəzərdən keçirilir. İki ölkə arasında diplomatik əlaqələr hələ də tam bərpa olunmayıb. Qarabağ münaqişəsi, 1915-ci il hadisələrinin qiymətləndirilməsi kimi məsələlər tərəflər arasında uzun illər gərginlik yaradıb.

1993-cü ildən bəri Ermənistan-Türkiyə sərhədi bağlıdır. Lakin 2022-ci ildən etibarən ölkələr arasında aviareyslər bərpa edilib və xüsusi nümayəndələr vasitəsilə əməkdaşlığın genişləndirilməsi üzrə danışıqlar davam edir.