BMT-nin İnsan Hüquqları Şurasının Araşdırma Komissiyası İsrailin Qəzza sektorunda həyata keçirdiyi hərəkətləri soyqırımı kimi qiymətləndirib. Komissiyanın hesabatında vurğulanır ki, İsrail hakimiyyəti fələstinlilərin reproduktiv imkanlarını qismən məhv edib, doğumun qarşısını almağa yönəlmiş tədbirlər görüb və insanların ölümünə səbəb olan şərait yaradıb.

Sənəddə bu addımlar Roma Statutu və Soyqırım Konvensiyasına əsasən soyqırımı aktı kimi göstərilib. Hesabatda qeyd olunur ki, 1948-ci ildən bəri ən amansız olan bu hərəkətlər yalnız baş nazir Benyamin Netanyahu deyil, digər siyasi xadimlər tərəfindən də təşviq olunur.

İsrailin Xarici İşlər Nazirliyi isə sənədi rədd edərək, onun Həmasın yalanlarına əsaslandığını bildirib.

Buna baxmayaraq, Netanyahu Qəzzaya yeni hücum əməliyyatlarının başladığını təsdiqləyib. Sentyabrın 16-na keçən gecə İsrail ordusu Qəzzaya 20 dəqiqə ərzində 37 hava zərbəsi endirib.

Növbəti həftə Nyu-Yorkda keçiriləcək BMT Baş Assambleyasında Böyük Britaniya, Fransa, Kanada, Avstraliya və digər dövlətlərin Fələstin müstəqilliyini tanıyacağı gözlənilir. Artıq 100-dən çox ölkə bu addımı atıb. Netanyahu bu qərarı “antisemitizm” adlandıraraq, fələstinlilərin müstəqilliyinə qarşı çıxıb.

2023-cü ilin oktyabrında Həmasın hücumundan sonra başlayan İsrail hərbi əməliyyatları nəticəsində indiyədək 63 min nəfər həyatını itirib, Qəzzadakı tikililərin çoxu dağıdılıb, əhalinin əksəriyyəti dəfələrlə evlərini tərk etməyə məcbur olub.

BMT-nin Qlobal Aclıq Monitorinqi bölgədə “insan tərəfindən yaradılmış aclıq” olduğunu bəyan etsə də, İsrail bunu inkar edir.
Sentyabrın 1-də isə Beynəlxalq Soyqırımı Tədqiqatçıları Assosiasiyası İsrailin Qəzzada soyqırımı törətdiyini göstərən hüquqi əsasların mövcudluğu barədə qətnamə qəbul edib.