Rusiyalı araşdırmaçılar Roman Badanin və Mixail Rubin yeni nəşr etdikləri “Şəxsi Çar” kitabında Rusiya prezidenti Vladimir Putinin valideynlərinin həyatından indiyədək gizli qalmış bir hadisəni açıqlayıblar.

Müəlliflərin yazdıqlarına görə, Putinin anası Mariya İvanovna gənc yaşlarında bir gözünü itirib. Onun gələcək əri Vladimir Spiridonoviç təsadüfən onu dirəklə üzündən vurub. Hadisə təxminən 1928-ci ildə Tver vilayətinin Turqinovo kəndində baş verib.

İddiaya görə, Mariya evinə qonaq çağırdığı Vladimirin dostları ilə birlikdə gələcəyini gözləməyib və qapını açmaq istəməyib. Bundan sonra gənclər dirəklərlə qapını zorla sındırmağa çalışıblar. Zərbələrdən biri Mariyanın üzünə dəyib və nəticədə həkimlər onun gözünü çıxarmağa məcbur qalıblar.

Müəlliflər bildirirlər ki, hadisədən sonra Mariyanın anası oğlanı məhkəmə ilə hədələyərək qızına evlənməyə məcbur edib. Bu səbəbdən cütlük Leninqrada köçüb. Vladimir Spiridonoviç zavodda işləməyə başlayıb, Mariya isə çəkilən azsaylı fotolarda adətən üzünü elə saxlayıb ki, zədələnmiş tərəfi görünməsin.

Bu iddialar Putinin valideynləri barədə rəsmi versiyalarla ziddiyyət təşkil edir. Prezident özü də dəfələrlə atasını sərt və kobud biri kimi tanımadığını söyləyib.

Roman Badanin və Mixail Rubinin “Şəxsi Çar” kitabı 2025-ci ilin iyul ayında işıq üzü görüb.