SOCAR-ın İnvestisiya departamentinin sabiq rəhbər müavini, hazırda həbsdə olan iş adamı Adnan Əhmədzadənin vəkili Şaiq Mirzəyev dövlət qurumundakı vəzifəsindən çıxarılıb.

O, Əmək və Əhalinin Sosial Müdafiəsi Nazirliyinin tabeliyində fəaliyyət göstərən **“Əmək Bazarı və Sosial Müdafiə Məsələləri üzrə Milli Observatoriya”**da Hüquq, kadrlar və sənədlərlə iş departamentinin müdiri postunu tuturdu.

Məsələ hüquqşünas Əkrəm Həsənov tərəfindən ictimailəşdirilib. O, sosial şəbəkədə paylaşım edərək Mirzəyevin dövlət qurumunda vəzifə tutmasını qanunsuzluq adlandırıb və bununla bağlı Baş prokurorluq, DİN, DTX və Əmək və Əhalinin Sosial Müdafiəsi Nazirliyinə müraciət ünvanlayıb.

Məsələ ictimai müzakirəyə çıxarıldıqdan sonra Milli Observatoriyanın mətbuat katibi Fidan Seyidşahqızı açıqlama verib: “Adı çəkilən şəxs hazırda Milli Observatoriyanın əməkdaşı deyil, onunla əmək müqaviləsinə xitam verilmişdir”.

Bununla belə, Şaiq Mirzəyevin nə vaxt işdən azad olunduğu barədə dəqiq tarix açıqlanmayıb. Qurumun saytındakı əməkdaş siyahısından onun adı yalnız bu gün silinib.