Gürcüstanın Baş naziri İrakli Kobaxidze bildirib ki, ölkədə konstitusiyalı quruluşu devirməyə yönəlmiş aksiyalara bəzi əcnəbilər və diplomatlar birbaşa dəstək göstəriblər.

Bu barədə o, hakim “Gürcü Arzusu” Partiyasının ofisində keçirilən brifinqdə çıxışı zamanı məlumat verib.

“Aksiyalarda zorakılıq törədən şəxslər məsuliyyətdən yayınmayacaq. Heç kim cəzasız qalmayacaq. Cinayətkarları müəyyən etmək üçün bu il keçən ildəkindən qat-qat çox resurslarımız var”, – Kobaxidze vurğulayıb.

Baş nazirin sözlərinə görə, artıq bir neçə nəfər saxlanılıb və daha çox şəxsin müəyyən edilərək məsuliyyətə cəlb olunacağı gözlənilir.

Kobaxidze əlavə edib ki, dövlətə və hüquq-mühafizə orqanlarına qarşı törədilən zorakılıqlarda iştirak edənlər qanun qarşısında cavab verəcəklər:
“Konkrekt şəxslər – o cümlədən əcnəbilər və diplomatlar – öz üzlərini göstəriblər. Bir daha xatırladıram ki, bəzi strukturların nümayəndələri aksiyalara birbaşa dəstək veriblər. Buna baxmayaraq, bu gün susurlar. Cəmiyyət isə bunu görür”, – Baş nazir qeyd edib.

O həmçinin aksiyalar zamanı yaralanan polis əməkdaşlarından da danışıb. Kobaxidzenin sözlərinə görə, 15 polis əməkdaşı xəsarət alaraq xəstəxanaya yerləşdirilib, vəziyyətləri sabitdir və onların səhhəti yaxşılaşır.

Baş nazir xidmətdə olan bütün polis əməkdaşlarına xüsusi təşəkkürünü bildirib və onların təhlükəsizliyinə dövlətin tam dəstək verdiyini vurğulayıb.