Bu gün Bakıda Azərbaycan, İran və Rusiya arasında yüksək səviyyəli üçtərəfli görüş baş tutub.

Tədbirə Azərbaycan Respublikası Baş nazirinin müavini Şahin Mustafayev, Rusiya Federasiyası hökumət sədrinin müavini Aleksey Overçuk və İranın yol və şəhərsalma naziri Fərzanə Sadiq həmsədrlik edib. Görüşdə hər üç ölkənin aidiyyəti qurumlarının nümayəndələri iştirak ediblər.

Şahin Mustafayev çıxışında Azərbaycan, İran və Rusiya arasında mehriban qonşuluq və qarşılıqlı faydalı əməkdaşlıq prinsiplərinə sadiqliyi vurğulayıb. O, Prezident İlham Əliyevin təşəbbüsü ilə yaradılmış üçtərəfli formatın regional əməkdaşlığın inkişafında mühüm rol oynadığını xatırladıb.

Müzakirələrdə nəqliyyat, energetika və gömrük sahələrində əməkdaşlığın genişləndirilməsi, eləcə də Şimal–Cənub nəqliyyat dəhlizinin inkişafı əsas mövzulardan olub. Qeyd edilib ki, Rəşt–Astara dəmir yolunun tikintisi və Astaraçay üzərində yeni körpünün istismara verilməsi dəhlizin səmərəliliyini artıracaq.

Şahin Mustafayev bildirib ki, gələcəkdə Azərbaycan ərazisindən daşınan yüklərin həcmi ildə azı 15 milyon tona çatdırılacaq. O, həmçinin Ağbənd–Kəlalə körpüsünün tikintisinin ilin sonunadək tamamlanmasının nəzərdə tutulduğunu deyib.

Energetika sahəsində üçtərəfli əməkdaşlığın gücləndirilməsi, xüsusilə Azərbaycan, İran və Rusiya elektrik şəbəkələrinin birləşdirilməsi layihəsi də müzakirə olunub.

Görüşün sonunda tərəflər birgə Kommünike qəbul ediblər.