Daxili İşlər Nazirliyinin Baş Dövlət Yol Polisi İdarəsi (BDYPİ) piyadalara təhlükəsizlik qaydalarına əməl etmələri ilə bağlı müraciət edib.

Müraciətdə bildirilir ki, son dövrlərdə yollarda müşahidə olunan ən təhlükəli hallardan biri piyadaların yol hərəkəti qaydalarına laqeyd yanaşmasıdır:

“Bəzən insanlar yaxınlıqda yeraltı və ya yerüstü piyada keçidi olduğu halda, sədləri aşaraq və ya yolun hərəkət hissəsinə çıxaraq öz həyatlarını təhlükəyə atırlar. Bir anlıq tələskənlik, diqqətsizlik və ya səhlənkarlıq çox vaxt faciəvi nəticə ilə bitir”.

DYP-nin məlumatına görə, aparılmış araşdırmalar göstərir ki, piyada vurulması ilə nəticələnən hadisələrin 90 faizdən çoxu məhz keçidlərdən kənarda baş verir.

Qurum xatırladıb ki, qaydaların pozulması yalnız intizam qaydasında məsuliyyət deyil, cinayət məsuliyyəti də yarada bilər:

“Əgər piyadanın qayda pozuntusu nəticəsində yol-nəqliyyat hadisəsi baş verərsə və bu hadisə insanın xəsarət almasına və ya ölümünə səbəb olarsa, bu artıq cinayət məsuliyyəti yaradır”.

Payız-qış mövsümünün yaxınlaşması ilə əlaqədar BDYPİ piyadalara yenidən müraciət edib:
• Yolu yalnız piyada keçidlərindən keçin;
• Görünmə məhdud olan şəraitdə və qaranlıq vaxtı parlaq geyimlər geyinin;
• Qulaqlıqdan istifadə etməyin, yaxınlaşan avtomobillərin səsini eşidin.

Sonda qurum bir daha xatırladıb:

“Qaydalara əməl etmək sadəcə tövsiyə deyil, sizin və ətrafınızdakı insanların həyatının təminatıdır”.