Qəzza zolağında gərginliyin davam etdiyi bir vaxtda Azərbaycan Ordusunun bölgəyə sülhməramlı missiya göndərib-göndərməyəcəyi məsələsi gündəmə gəlib.

Açıqlama verən ehtiyatda olan polkovnik Rövşən Məhərrəmov bildirib ki, Azərbaycan ordusunun bu istiqamətdə kifayət qədər təcrübəsi mövcuddur:

“Sülhməramlı kontingentimiz əvvəllər Əfqanıstanda və Avropada xidmət aparıb. Həmin dövrdə Azərbaycan hərbçiləri Türkiyə ordusunun tərkibində fəaliyyət göstərib və bu, onlara ciddi təcrübə qazandırıb. Hazırda da ordumuzun tərkibində daim təlimlərdə iştirak edən, hazırlıq prosesindən keçən sülhməramlı qüvvələr mövcuddur. Bu, hər ölkənin ordusunda olan potensial deyil, lakin Azərbaycan belə bir qüvvəyə malikdir”.

Polkovnikin sözlərinə görə, Azərbaycan sülhməramlıları həm Türkiyə, həm də digər müsəlman ölkələrinin tərkibində bu missiyanı icra edə bilər:

“Güman edirəm ki, Azərbaycan istənilən dövlətin, o cümlədən Türkiyənin tərkibində bu vəzifəni yerinə yetirməyə qadirdir. Hətta Azərbaycan Ordusu sərbəst şəkildə də Qəzzada və digər münaqişə zonalarında sülhməramlı missiyanı icra edə bilər”.

Bununla belə, Məhərrəmov vurğulayıb ki, belə missiyaların həyata keçirilməsi dövlətlərin öz qərarı ilə mümkün deyil:

“Sülhməramlı qüvvələrin hər hansı əraziyə yerləşdirilməsi yalnız Birləşmiş Millətlər Təşkilatının (BMT) qərarı ilə mümkündür. Əgər BMT bu istiqamətdə qərar qəbul etsə, Azərbaycanın müzəffər ordusunun sülhməramlı qüvvələri Türkiyə və digər dövlətlərlə birgə bu missiyanı yerinə yetirə bilər”.