Azərbaycan Respublikasının Prezidenti İlham Əliyev noyabrın 15-də Özbəkistanın paytaxtı Daşkənddə İslam Sivilizasiyası Mərkəzi ilə tanış olub.

Mərkəz, Özbəkistan Prezidenti Şavkat Mirziyoyevin qərarı ilə təsis edilib və təməli 2018-ci ildə qoyulub. Layihənin həyata keçirilməsində yüzlərlə alim, ekspert, dini və ictimai xadim iştirak edib. Səmərqənd şəhərinin qədim memarlıq abidələri üslubunda inşa olunan mərkəz 10 hektardan çox ərazini əhatə edir və binada 65 metr hündürlüyündə günbəz yerləşir.

Mərkəzdə tədqiqat şöbələri, nadir əlyazmalar fondu, kitabxana, arxiv və nəşriyyat şöbələri fəaliyyət göstərir. Sərgi qalereyasında müxtəlif tarixi dövrlərə aid əşyalar və əsərlər nümayiş olunur, əcdadların yaradıcılıq potensialı müasir texnologiyalar vasitəsilə təqdim edilir.

Kitabxana və elmi şöbənda 100 minə yaxın əlyazma və bir milyondan çox kitab mövcuddur. Muzey ekspozisiyasında “İslamdan əvvəl sivilizasiyalar”, “Birinci İntibah dövrü”, “İkinci İntibah dövrü”, “XX əsrdə Özbəkistan”, “Yeni Özbəkistan – Üçüncü İntibahın əsası” və “Müqəddəs Quran” adlı zallar fəaliyyət göstərir.

“Müqəddəs Quran” zalında “Osman Quranı”, həmçinin Samanilər, Qaraxanlılar, Xarəzmşahlar və Teymurilər dövründə yazılmış əlyazma Qur’an nüsxələri sərgilənir. Burada həmçinin dini maarifləndirici və innovativ media layihələri həyata keçirilir.

Mərkəzdə holoqrafiya, proyeksiya və multimedia texnologiyaları vasitəsilə “Zaman divarı” adlı paneldə tarixi mərhələlər, böyük kəşflər və görkəmli şəxsiyyətlər haqqında məlumat təqdim olunur. Mərkəz UNESCO və ICESCO da daxil olmaqla bir sıra beynəlxalq təşkilatlarla əməkdaşlıq edir.

Azərbaycan Prezidenti İlham Əliyev mərkəzdə yaradılan imkanları yüksək qiymətləndirərək, bu nüfuzlu institusiyanın İslam sivilizasiyasının irsini qorumaq və dünyaya tanıtmaq baxımından əhəmiyyətini vurğulayıb.