Azərbaycan Respublikasının Prezidenti İlham Əliyev yanvarın 4-də ABŞ nümayəndə heyətini qəbul edib.

Nümayəndə heyətinə ABŞ Senatının Silahlı Qüvvələr Komitəsinin üzvü, Oklahomadan respublikaçı senator Markveyn Mallin, Nümayəndələr Palatasının üzvü və Gəlirlər Komitəsinin sədri, Missuridən respublikaçı Ceyson Smit, Nümayəndələr Palatasının və Silahlı Qüvvələr Komitəsinin üzvü, Texasdan respublikaçı Ronni Cekson, eləcə də Nümayəndələr Palatasının və Gəlirlər Komitəsinin üzvü, Kaliforniyadan demokrat Cimmi Panetta daxil olub.

Qonaqlar qəbula görə Prezident İlham Əliyevə minnətdarlıqlarını bildirərək, Bakıda müşahidə etdikləri inkişaf proseslərinin onlarda dərin təəssürat yaratdığını vurğulayıblar. Onlar ötən ilin avqustunda Azərbaycanla Ermənistan arasında sülh gündəliyinin irəli aparılması ilə bağlı Vaşinqtonda əldə edilmiş nailiyyətlər münasibətilə dövlətimizin başçısını təbrik ediblər.

Prezident İlham Əliyev təbriklərə görə təşəkkürünü bildirib, əldə olunmuş razılaşmaların tarixi əhəmiyyət daşıdığını qeyd edərək bu prosesdə ABŞ Prezidenti Donald Trampın rolunu xüsusi vurğulayıb. Dövlətimizin başçısı Azərbaycanın regional sülh gündəliyinin irəli aparılması istiqamətində səylərini bundan sonra da davam etdirəcəyini bildirib.

Prezident İlham Əliyev artıq Azərbaycanla Ermənistan arasında ticarət münasibətlərinin formalaşdığını qeyd edərək, Azərbaycanın neft məhsullarının Ermənistana ixrac edildiyini, həmçinin Qazaxıstan və Rusiyadan buğdanın Azərbaycan ərazisindən keçməklə Ermənistana daşındığını diqqətə çatdırıb. O, TRİPP dəhlizinin regional nəqliyyat bağlantıları baxımından yeni imkanlar yaradacağına ümidvar olduğunu bildirib.

Dövlətimizin başçısı “Azadlığa Dəstək Aktı”na edilən 907-ci düzəlişin ədalətsiz olduğunu və ölkələrimiz arasında mövcud münasibətlərin inkişaf səviyyəsinə uyğun gəlmədiyini vurğulayıb. Prezident İlham Əliyev ABŞ Prezidenti Donald Tramp tərəfindən bu düzəlişin fəaliyyətinin dayandırılmasını yüksək qiymətləndirərək, onun tamamilə ləğv edilməsi istiqamətində Konqres üzvlərinin səylərinin davam edəcəyinə ümidvar olduğunu bildirib.

Görüşdə Azərbaycan–ABŞ ikitərəfli münasibətlərinin inkişafından məmnunluq ifadə olunub, siyasi, iqtisadi, enerji, müdafiə və müdafiə sənayesi, təhsil, informasiya texnologiyaları, süni intellekt və digər sahələrdə əməkdaşlığın genişləndirilməsi üçün yaxşı imkanların olduğu qeyd edilib.

Söhbət zamanı iki ölkənin qanunverici orqanları arasında əməkdaşlığın perspektivləri barədə də fikir mübadiləsi aparılıb.