Ana Vətən Partiyasının (AVP) qurultayı keçirilib. Qurultayda partiya sədrinin müavini, Milli Məclisin deputatı Günay Ağamalı Ana Vətən Partiyasının sədri seçilib.

Qurultaydan sonra partiya daxilində yaranmış vəziyyətlə bağlı AVP-nin sədri, keçmiş deputat Fəzail Ağamalının oğlu Elçin Ağamalı sosial şəbəkə hesabında geniş açıqlama yayıb. O bildirib ki, 25 oktyabr 2025-ci ildə keçirilən qurultaydan sonra müzakirələrin daha da gərginləşməməsi üçün bir müddət mətbuat və sosial şəbəkələrdə ona ünvanlanan sualları cavablandırmaqdan çəkinib.

Elçin Ağamalının sözlərinə görə, partiya daxilində yaranmış problemlərin qarşılıqlı dialoq yolu ilə həlli üçün çoxsaylı təşəbbüslər göstərsə də, bu cəhdlər müsbət nəticə verməyib:

“Şəxsimə qarşı olan haqsız münasibətlə barışaraq geri addım atmaq barədə düşüncələrim olub. Lakin qurultaydan sonra partiyada gedən proseslər məni bu fikirdən daşındırdı.”

O iddia edib ki, qurultaydan sonra onun namizədliyini dəstəkləyən rayon və şəhər təşkilatlarının sədrlərinə qarşı təzyiqlər başlayıb. Bildirilib ki, həmin şəxslər əsassız ittihamlarla, bəzi hallarda isə heç bir əsas göstərilmədən partiya sıralarından və vəzifələrindən uzaqlaşdırılıblar. Elçin Ağamalının sözlərinə görə, bu proses partiyanın mövcud yerli təşkilatlarının təxminən dörddə üçünü əhatə edir.

Açıqlamada həmçinin qeyd olunub ki, qərarlar qeyri-legitim partiya strukturlarının adından qəbul edilib və nizamnamə müddəalarının kobud şəkildə pozulması ilə müşayiət olunan yeni qurultay gizli şəkildə keçirilib. Onun iddiasına görə, Bakı və ətraf rayonlardan gələn, əsasən partiya üzvü olmayan şəxslərin iştirakı ilə keçirilən bu qurultay qeyri-legitimdir və gələcək hüquqi mübahisələr üçün əsas yaradır.

Elçin Ağamalı bildirib ki, vəzifələrindən kənarlaşdırılan rayon və şəhər təşkilatlarının sədrləri hüquqlarının bərpası və qurultaydan sonra qəbul edilmiş bəzi qərarların ləğvi üçün məhkəməyə müraciət ediblər:

“Onların bundan sonra müdafiə olunması mənim üçün artıq vicdan məsələsidir. Məhkəmə prosesinin gedişi barədə mətbuata mütəmadi açıqlamalar veriləcək.”

Qeyd edək ki, bu gün Ana Vətən Partiyasının növbəti qurultayı keçirilib və qurultayda deputat Günay Ağamalının partiya sədri seçildiyi açıqlanıb. Partiya daxilində baş verən proseslər və irəli sürülən iddialarla bağlı rəsmi mövqe hələlik açıqlanmayıb.