Azərbaycan Respublikasının Prezidenti İlham Əliyev yanvarın 27-də Sumqayıt Sənaye Parkında “Azermirror” MMC-nin güzgü vərəqələrinin istehsalı zavodunun açılışında iştirak edib.

Açılış mərasimində iqtisadiyyat naziri Mikayıl Cabbarov dövlətimizin başçısına ölkədə yaradılan sənaye zonaları və Sumqayıt Sənaye Parkının fəaliyyəti barədə məlumat verib. Bildirilib ki, hazırda sənaye zonalarında 104 müəssisə istehsal fəaliyyətinə başlayıb, bu zonalara 7 milyard manatdan çox investisiya yatırılıb və 11 mindən artıq daimi iş yeri yaradılıb. İndiyədək sənaye zonalarında 19,4 milyard manatlıq məhsul istehsal olunub, bunun 6,1 milyard manatı ixrac edilib. Azərbaycan sənaye zonalarında istehsal olunan məhsullar 70 ölkəyə ixrac olunur.

Qeyd edilib ki, sənaye parkları və sənaye məhəllələrinin yaradılması iqtisadiyyatın şaxələndirilməsi, qeyri-neft sektorunun inkişafı, innovativ istehsalın təşviqi və məşğulluğun artırılması baxımından mühüm əhəmiyyət daşıyır. Hazırda ölkədə 8 sənaye parkı fəaliyyət göstərir, Naxçıvan Sənaye Parkının və Qərb Sənaye Parkının yaradılması istiqamətində işlər aparılır. Bununla yanaşı, Masallı, Neftçala, Sabirabad və Şərur sənaye məhəllələri də fəaliyyət göstərir.

Ümumi sahəsi 640 hektar olan Sumqayıt Sənaye Parkında hazırda 40 rezident fəaliyyət göstərir. Parkda layihələrin ümumi dəyəri 6,7 milyard manat, faktiki investisiya həcmi isə 5,5 milyard manat təşkil edir. Burada 6135 nəfər işlə təmin olunub, ümumilikdə 8800-ə yaxın yeni iş yerinin yaradılması nəzərdə tutulur. Rezidentlərin satış həcmi 15,4 milyard manata, ixrac isə 5,7 milyard manata çatıb.

“Azermirror” MMC-nin təsisçisi Rüstəm Abbasov Prezident İlham Əliyevə müəssisə barədə məlumat verib. Bildirilib ki, MMC 2023-cü ildə Sumqayıt Sənaye Parkının rezidenti statusunu alıb və parkın 1 hektar ərazisində güzgü vərəqələrinin istehsalı zavodu inşa edib. Müəssisədə 30 nəfər daimi işlə təmin olunub. Zavodun illik istehsal gücü 900 min kvadratmetr təşkil edir. Məhsulların daxili bazarla yanaşı, ixracı da nəzərdə tutulur.

Çin texnologiyası əsasında qurulan layihənin investisiya dəyəri 6,13 milyon manatdır. Müəssisəyə Azərbaycan Biznesinin İnkişafı Fondu tərəfindən 1,5 milyon manat güzəştli kredit ayrılıb. “Azermirror” MMC rezidentlər üçün nəzərdə tutulan güzəştlərdən yararlanaraq 600 min manat dəyərində vergi və gömrük azadolması əldə edib.

Qeyd edilib ki, qeyri-neft sənayesinin inkişafı Prezident İlham Əliyevin rəhbərliyi ilə həyata keçirilən dövlət siyasətinin əsas prioritetlərindən biridir və bu istiqamətdə sistemli tədbirlər davam etdirilir.