Fevralın 9-da Azərbaycan Respublikasının Prezidenti İlham Əliyev ABŞ Ticarət Palatasının beynəlxalq üzvlərlə əlaqələr, Yaxın Şərq və Türkiyə üzrə baş vitse-prezidenti Kuş Çoksinin rəhbərlik etdiyi nümayəndə heyətini qəbul edib.

Nümayəndə heyətinə Palatanın Yaxın Şərq, Mərkəzi Asiya və Türkiyə üzrə vitse-prezidenti Cennifer Miel, eləcə də “Apple”, “Ericsson AB”, “ExxonMobil”, “Meta”, “Visa”, “Boeing Global”, “Honeywell”, “J.P.Morgan”, “Marriott”, “Mastercard”, “Shell International” və digər iri şirkətlərin rəhbərləri daxildir.

Prezident İlham Əliyev qonaqları salamlayaraq bildirib ki, bu səfər ölkələrimiz arasında münasibətlərin fəal inkişaf etdiyi mühüm dövrdə həyata keçirilir:
“Biz hazırda ikitərəfli əlaqələrin çox ümidverici və fəal olan yeni mərhələsinə qədəm qoyuruq. ABŞ Vitse-prezidentinin səfəri ərəfəsində sizin nümayəndə heyətinizin gəlişi də olduqca əhəmiyyətlidir. Təmaslarımızın bir hissəsi biznes, sərmayə və ticarət münasibətləri üzərində cəmləşib və ümid edirəm ki, bu səfər nəticəsində müxtəlif istiqamətlərdə daha fəal əməkdaşlıq üçün zəmin yaranacaq.”

Prezident həmçinin bildirib ki, ABŞ nümayəndə heyətinin ölkəsinin iqtisadiyyatının müxtəlif seqmentlərini təmsil etməsi Azərbaycan üçün faydalıdır, çünki iki ölkə arasındakı iqtisadi əlaqələr hələ arzulanan səviyyədə deyil.