Xəbər verdiyimiz kimi, Vüqar Qurbanov TƏBİB-in icraçı direktoru vəzifəsindən azad olunub. Onun səlahiyyətləri qurumun icraçı direktorunun müavini Anar İsrafilova həvalə edilib.

Anar İsrafilov yeni təyinatı ilə bağlı manşet.az-a qısa açıqlamasında bildirib:
“Hələ ki yeni təyin olunmuşam. Yəqin ki, TƏBİB-də kadr dəyişiklikləri və yeniliklər olacaq. Hələ ki bu barədə nəsə deyə bilmirəm”.

Anar İsrafilov kimdir?

Anar İsrafilov Azərbaycan Tibb Universitetində Pediatriya ixtisası üzrə təhsil alıb. O, həmçinin Azərbaycan Respublikasının Prezidenti yanında Dövlət İdarəçilik Akademiyasında Dövlət və bələdiyyə idarəetməsi üzrə təhsilini başa vurub.

Hazırda Azərbaycan Tibb Universitetində Nefrologiya ixtisası üzrə doktorantura təhsilini davam etdirir. Müxtəlif dövlət və özəl tibb müəssisələrində uşaq nefroloqu kimi çalışıb.

2006–2022-ci illərdə Azərbaycan Respublikasının Səhiyyə Nazirliyində müxtəlif vəzifələrdə işləyib. O, səhiyyə nazirinin köməkçisi və Nazirliyin Səhiyyənin təşkili şöbəsinin müdiri olub.

2022-ci ildən isə TƏBİB-in icraçı direktorunun müavini vəzifəsində fəaliyyət göstərir.

Qeyd edək ki, Vüqar Qurbanov 2022-ci ilin sentyabrında TƏBİB-in icraçı direktoru təyin edilmişdi. Qurum rəhbəri Müşahidə Şurasının qərarı ilə vəzifəsindən azad olunur. TƏBİB-in Müşahidə Şurasının sədri Zaur Əliyevdir.