İndiyə qədər İranda yalnız bir nəfər Azərbaycan vətəndaşı xəsarət alıb.

Bu barədə Azərbaycan Xarici İşlər Nazirliyinin Mətbuat xidməti idarəsinin rəisi Ayxan Hacızadə regionda hərbi eskalasiya şəraitində vətəndaşlarımızın vəziyyəti ilə bağlı sorğuya cavabında bildirib.

Qeyd olunub ki, böhran vəziyyətinə uyğun olaraq, bölgədə yerləşən Azərbaycanın səfirlikləri və baş konsulluqları fəaliyyətini gücləndirilmiş rejimdə davam etdirir.

“Vətəndaşlarımızdan daxil olan müraciətlərə uyğun olaraq diplomatik missiyalarımız tərəfindən müvafiq dəstək göstərilir. İndiyə qədər yalnız bir nəfər vətəndaşımız xəsarət alıb. Həmin şəxsə diplomatik missiyamız tərəfindən lazımi yardım göstərilir və onun vəziyyəti yaxşıdır”, – deyə açıqlamada bildirilib.

Vətəndaşların təxliyyəsi məsələsinə toxunan XİN rəsmisi qeyd edib ki, hazırda Nazirliyin paylaşdığı səyahət xəbərdarlığına uyğun olaraq İran ərazisində olan Azərbaycan vətəndaşlarının ölkədən çıxışı yerləşmə bölgəsindən asılı olaraq Azərbaycan və Türkiyə ilə quru sərhədlər vasitəsilə həyata keçirilir.

İndiyə qədər 30 nəfər Azərbaycan vətəndaşı Azərbaycan sərhədindən keçid edib.

Ümumilikdə, bölgədə hava məkanının bağlı olduğu nəzərə alınaraq, hazırkı mərhələdə genişmiqyaslı təxliyyə nəzərdə tutulmur.

XİN bölgədə olan vətəndaşlara təhlükəsizlik vəziyyətini diqqətlə izləməyi, yerli hakimiyyət orqanlarının göstəriş və tövsiyələrinə əməl etməyi, kütləvi toplaşma yerlərindən uzaq durmağı və şəxsi təhlükəsizlik tədbirlərini gücləndirməyi tövsiyə edib.