Azərbaycan Respublikası İranın Ermənistandakı səfiri Mehdi Sobhaninin ölkəmizin ərazisindən guya İsrail tərəfindən İrana qarşı hücumlar həyata keçirilməsi ilə bağlı səsləndirdiyi fikirlərə sərt reaksiya verib. Azərbaycan Xarici İşlər Nazirliyinin Mətbuat xidməti idarəsinin rəisi Ayxan Hacızadə bu iddiaların qətiyyətlə rədd edildiyini bildirib.

Ayxan Hacızadənin yaydığı açıqlamada qeyd olunur ki, səfir Sobhaninin səsləndirdiyi fikirlər əsassız və təxribat xarakterlidir:

“Bu iddialar Azərbaycan və İran arasında bir-birinin ərazi bütövlüyü və suverenliyinə qarşılıqlı hörmət, daxili işlərə qarışmama prinsiplərinə əsaslanan münasibətlərə ciddi zərbə vurur.”

XİN rəsmisi əlavə edib ki, Azərbaycan Prezidenti İlham Əliyev və İran Prezidenti Məsud Pezeşkian arasında baş tutan son telefon danışığında, həmçinin xarici işlər nazirləri səviyyəsində aparılmış təmaslarda Azərbaycanın bu məsələ ilə bağlı mövqeyi açıq şəkildə izah olunub. Bu fonda İran səfirinin iddiaları açıq təxribat kimi qiymətləndirilir.

Ayxan Hacızadə bildirib:

“Azərbaycan Respublikası onun hava məkanının və ya ərazisinin hər hansı dövlət tərəfindən İran İslam Respublikasına və ya digər ölkəyə qarşı hərbi əməliyyatlar üçün istifadə olunması barədə bütün iddiaları qəti şəkildə inkar edir. Bu cür fikirlər əsassızdır və heç bir mötəbər sübuta əsaslanmır.”

Azərbaycan XİN rəsmisi, həmçinin, İran tərəfinə müraciət edərək bu kimi münasibətlərə zidd addımların qarşısının alınmasını və “ermənipərəst mövqeyi ilə seçilən səfirin” fikirləri ilə bağlı müvafiq tədbirlərin görülməsini gözlədiklərini bildirib.

Bu açıqlama İran və Azərbaycan arasında İsrailin İrana qarşı hərbi əməliyyatlarında Azərbaycanın hava məkanından guya istifadə olunması ilə bağlı yayılan iddialar fonunda verilib. Rəsmi Bakı bu iddiaları təkzib etməklə yanaşı, münasibətlərin gərginləşdirilməsinə xidmət edən açıqlamaların qəbuledilməz olduğunu vurğulayıb.