Avropa İnsan Hüquqları Məhkəməsi Bakının Səbail rayonunda sökülmüş evlə bağlı Azərbaycan hökumətinin 130 min avrodan çox təzminat ödəməsi barədə qərar qəbul edib.

Qərar martın 24-də elan olunub. İş üzrə ərizəçilər Səbail rayonunun sakinləri Zaur Məmmədov və anası Yelena Məmmədova olub. Onlar 2016-cı ildə Səbail Rayon İcra Hakimiyyətinin qərarı ilə yaşadıqları binanın sökülməsindən şikayət ediblər.

Həmin il Nazirlər Kabinetinin Bakının bir neçə rayonunda sosial-iqtisadi inkişafın sürətləndirilməsi ilə bağlı qərarına əsasən, yerli icra hakimiyyəti binanın qəzalı vəziyyətdə olduğunu əsas gətirərək sökülməsinə və yerində çoxmərtəbəli yaşayış binasının tikilməsinə qərar verib.

Məmmədovlar icra hakimiyyətinin qərarının etibarsız sayılması üçün Bakı İnzibati-İqtisadi Məhkəməsinə müraciət etsələr də, məhkəmə iddianı təmin etməyib. Yerli məhkəmələr qərarı onunla əsaslandırıb ki, ərizəçilərə daha böyük və təmirli mənzil verilməsi və kirayə xərclərinin ödənilməsi nəzərdə tutulub, buna görə mülkiyyət hüquqları pozulmayıb.

Sonrakı məhkəmə instansiyaları da bu qərarı qüvvədə saxlayıb. Daha sonra ərizəçilər məsələ ilə bağlı Avropa İnsan Hüquqları Məhkəməsinə müraciət ediblər.

Avropa Məhkəməsi qərarında bildirib ki, yerli məhkəmələr maddi təzminat əvəzinə yalnız yeni mənzil verilməsini əsas götürüb, lakin bunun üçün konkret hüquqi norma göstərilməyib. Məhkəmə Avropa İnsan Hüquqları Konvensiyasının 1 saylı Protokolunun 1-ci maddəsinin pozulduğu qənaətinə gəlib.

Qərara əsasən, Azərbaycan hökuməti Zaur Məmmədov və Yelena Məmmədovaya maddi zərərə görə 126 min avro, mənəvi zərərə görə 3 min avro, hüquqi xərclərə görə isə 2 919 avro təzminat ödəməlidir.