“Erməni vəhşilərinin viran qoyduğu Ağdamı ziyarət edərkən iki hissi keçirməmək mümkün deyildi: bir tərəfdən 30 il düşmən tapdağında inləyən, indi isə rahat nəfəs alan, öz sakinlərini səbirsizliklə gözləyən doğma şəhərimizin azad edilməsindən qürur hissi keçirirdik, sevinirdik, digər tərəfdən də, dağıtınları seyr edərkən məyus olurduq. Ancaq sevincimizin daimi, məyusluğumuzun isə keçiçici olduğuna, bunun tez bir zamanda baş verəcəyinə dərindən inanırıq!”

Bu sözləri Reyting.az-a Prezident İlham Əliyevin təşəbbüsü, Prezident Administrasiyasının təşkilatçılığı ilə Ağdam şəhərini ziyarət etmiş Təkamül Partiyasının sədri, iqtisadçı alim Teyyub Qənioğlu deyib.

T. Qənioğlu bildirib ki, partiya rəhbərlərinin bu ziyarətində məqsəd ermənilərin vandallığını əyani görmək, bunları ictimaiyyətin nəzərinə çatdırmaq, bu ərazilərdən məcburi köçkün düşmüş əhali arasında təbliğatı daha da gücləndirərək onları işğaldan azad olunmuş ərazilərə icazəsiz getməkdən çəkindirmək idi.

Partiya sədri əlavə edib ki, Ağdama səfəri zamanı ermənilərin nə qədər alçaq, yaramaz, vandal bir toplum olduğunun əyani şahidinə çevrilib: “Dağıntıların bu dərəcədə olduğunu heç ağlıma da gətirmirdim. Ümid edirdim ki, heç olmasa, divarları salamat qamış bir neçə evi, ictimai binanı görə biləcəyik. Ancaq reallıq təsəvvür etdiyimdən daha acınacaqlı idi. Erməni vandalları nəinki bütün tikililəri dağıdıb, yandırıb, onlar daşınması mümkün olan hər şeyi talayıblar. Ən dəhşətlisi də budur ki, ermənilər bütün bunlarla kifayətlənməyib, dəfn olunmuş insanların qəbirlərini də dağıdıblar, məzarları qarət ediblər, sinə daşlarını söküb aparıblar”.

T. Qənioğlunun sözlərinə görə, dövlətimiz işğaldan azad edilmiş ərazilərimizin, o cümlədən Ağdamın tezliklə bərpa edilməsi istiqamətində bərpa-quruculuq işlərinə start verib: “Ancaq dağıntıların, miqyası, bu ərazilərin hər addımının erməni faşistləri tərəfindən minalandığı nəzərə alınaraq demək olar ki, bərpa-quruculuq işlərinin aparılması üçün bir müddət lazımdır. Təbii ki, doğma torpaqlarından köçkün düşmüş hər bir insan tezliklə bu torpaqlara qayıtmağa can atır və bu başadüşüləndir. Ancaq nəzərə almaq lazımdır ki, bu ərazilər minalanıb və həyat üçün çox təhlükəlidir. Ona görə də, doğma torpaqlarına qayıdacaqları günü səbirsizliklə gözləyən soydaşlarımıza səbirli olmağa, verilən tövsiyələrə əməl etməyə çağırıram”.

T. Əliyev inanır ki, işğal edilmiş torpaqlarımızın mənfur düşməndən azad edilməsi MÖHTƏŞƏM olduğu kimi, bu ərazilərə qayıdışımız da MÖHTƏŞƏM olacaqdır!