Ölkəmizdə benzinin, dizel yanacağının satış qiymətinin artırılması istehlak qiymətlərinin durmadan artmasına səbəb olub. Süni qiymət artımının qarşısının alınması üçün tədbir görülməməsi, bu azmış kimi, içməli suyun və tullantı sularının qiymətinin 100 faiz artırılması xalqın güzəranını pisləşdirib. Bütün bunlar isə cəmiyyətdə sosial gərginlik yaradıb.

Reyting.az xəbər verir ki, bunu Azərbaycan Təkamül Partiyası (ATM) Mərkəzi Şurasının videokonfrans formatında keçirilən iclasında partiyanın sədri, iqtisadçı alim Teyyub Qənioğlu deyib.

Onun sözlərinə görə, yaranmış vəziyyət minimum əmək pensiyası, minimum əmək haqqı, əlilliyə görə cüzi məbləğdə müavinət alan, xüsusilə də, işsiz vətəndaşların güzəranına olduqca mənfi təsir göstərir.

Təkamül Partiyası hesab edir ki, vəziyyətin getdikcə pisləşməməsi üçün əmək pensiyalarının, minimum əmək haqqının məbləğinin, ilkin olaraq, ən azı 50 faiz artırılması, aztəminatlı ailələrə, şəhid ailələrinə, müharibədə müxtəlif dərəcəli bədən xəsarəti almış qazilərə verilən təqaüdlərin əhəmiyyətli dərəcədə artırılması və bu zaman himayəsində olan azyaşlı uşaqların sayının nəzərə alınması məqsədəuyğundur. Sədr vurğulayıb ki, bu sahədə Əmək və Əhalinin Sosial Müdafiəsi Nazirliyinin fəaliyyətinin əsaslı şəkildə yaxşılaşdırılmasına ehtiyac var: “Ancaq KİV-də yayılan məlumatlar göstərir ki, qeyd edilən sahələrdə, xüsusilə Vətən müharibəsində əlil olmuş qazilərə münasibətdə, nazirliyin “fəaliyyəti” əks nəticələr doğurmaqdadır”.


T. Qənioğlu

Son illər ölkəmizdə aparılan iqtisadi islahatlara da toxunan T. Qənioğlu onları təqdir etdiyini, ancaq bu islahatların daha da genişləndirilməsinin vacibliyini diqqətə çatdırıb: “Bu, azad edilmiş ərazilərimizin bərpasının tezləşdirilməsi üçün xüsusi əhəmiyyət kəsb edir. ATP hesab edir ki, indiki zamanda bank-maliyyə sistemində, sığorta bazarında əsaslı islahatlara, iri xarici bankların və sığorta şirkətlərinin ölkəmizə gəlməsi üçün müvafiq hüquqi bazanın təkmilləşdirilməsinə ciddi ehtiyac var”.

Son illər ölkəmizdə aparılan kadr islahatlarına toxunan partiya sədri bu istiqamətdə tədbirlərin daha sürətlə həyata keçirilməsinin vacibliyini diqqətə çatdırıb:

“KİV-də yayılan məlumatlar göstərir ki, bəzi “köhnə” kadrların gənclərlə əvəz edilməsi və onların “fəaliyyəti” heç də həmişə uğurla nəticələnmir. Ona görə də, yeni kadrlar irəli çəkilərkən onların hansı “mühitdə yetişdiyi“ nəzərə alınmalı, bu sahədə himayədarlığa son qoyulmalıdır”.

Siyasi sahədə aparılan islahatlara toxunarkən Prezident İlham Əliyevin təşəbbüsü ilə son illər iqtidar-müxalifət münasibətlərinin sivil mübarizə müstəvisinə keçdiyini, siyasi dialoqon genişləndiyini müsbət qiymətləndirən ATP sədri, bu sahədə Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin fəaliyyətini təqdir etdiyini diqqətə çatdırıb: “Məlumdur ki, siyasi partiyaların normal fəaliyyətinin təmin edilməsi, xüsusilə onların müvafiq ofislərlə təmin edilməsi üçün Prezident İlham Əliyev müvafiq göstəriş verib. Təəssüf ki, Prezidentin göstərişinə zidd olaraq bu sahədə siyasi partiyalara differensial yanaşmanın şahid oluruq. Belə ki, Prezidentin göstərişinə uyğun olaraq Əmlak Məsələləri Dövlət Xidməti siyasi partiyalara ofislərin verilməsi üçün yerlər ayırıb və Azadlıq prospekti, 161 “B” ünvanında yerləşən köhnə binada ümumi sahəsi 99,2 m2, səmərəli sahəsi 40 m2 olan, hər birinin sahəsi təqribən 10 m2 olan iç-içə dörd “otaqlı” belə bir “yer” Təkamül Partiyasına da təklif edilib. Təbii ki, belə “ofis” siyasi partiyanın nəinki normal, heç elementar fəaliyyəti üçün məqbul deyildir. Bunu nəzərə alaraq Təkamül Partiyası rəsmi olaraq bu “ofisdən” imtina edib”.

Partiya sədri əlavə edib ki, siyasi partiyalar ofislə, avadanlıqla təmin edilərkən Əmlak Məsələləri Dövlət Xidmətinin differensial yanaşmasının səbəbləri, bu zaman hansı “prinsipləri” əsas götürdüyü Təkamül Partiyası üçün aydın deyildir.

İclasda təşkilati məsələ də müzakirə edilib. T. Qənioğlu partiyada üzün müddət səmərəli fəaliyyətini nəzərə alaraq, ATP Qadınlar Şurasının sədri, iqtisad üzrə fəlsəfə doktoru Şəms Əliyevanın partiya sədrinin müavini vəzifəsinə təyin edilməsi üçün verdiyi təqdimat yekdilliklə qəbul olunub.