«Red Bull» komandasının pilotu Serxio Peres Azərbaycan Qran-prisində finişə birinci çatmaqla, hər il fərqli qalibin çıxması ənənəsinə son qoyub.

Meksikalı sürücü 2021-ci ildə olduğu kimi, bu dəfə də Bakı trekində hamıdan sürətli olub.

Həmçinin, Niko Rozberq («Mercedes», 2016), Daniel Rikkiardo («Red Bull», 2017), Lüis Hemilton («Mercedes», 2018), Valtteri Bottas («Mercedes», 2019) və Maks Ferstappen («Red Bull», 2022) 2016-cı ildən təşkil edilən Azərbaycan Qran-prilərinin qalibi olublar.
«Red Bull» komandası dördüncü dəfə pilotunun Bakı trekində birinci olmasına sevinib. Digər üç yarışda «Mercedes"in sürücüsü finişə birinci çatıb.

Qeyd edək ki, Azərbaycan Qran-prisində «Red Bull"un digər pilotu Maks Ferstappen ikinci, «Ferrari"nin sürücüsü Şarl Lekler isə üçüncü yeri tutub.

Sonda “Formula 1” üzrə Azərbaycan Qran-prisinin qalibləri mükafatlandırılıblar.

Tədbirdə gənclər və idman naziri Fərid Qayıbov, Bakı Şəhər İcra Hakimiyyətinin başçısı Eldar Əzizov, Bakı Şəhər Halqasının icraçı direktoru Maqsud Fərzullayev, Azərbaycan Avtomobil Federasiyasının prezidenti Anar Ələkbərov və Beynəlxalq Avtomobil Federasiyasının prezidenti Məhəmməd Ben Sulayemi iştirak ediblər.

Onlar Bakı trekini ilk üç pillədə başa vuran pilotlara mükafatlarını təqdim ediblər.

Azərbaycan Qran-prisinin qalibi “Red Bull” komandasının sürücüsü Serxio Peres olub.
Onun komanda yoldaşı Maks Ferstappen ikinci, “Ferrari”dən Şarl Lekler üçüncü yeri tutaraq, podiuma çıxıblar.