Vaşinqton, 8 may — ABŞ Apellyasiya Məhkəməsi “Azad Avropa/Azadlıq Radiosu”nun (RFE/RL) fəaliyyətini davam etdirməsi üçün mühüm qərar verib. Kolumbiya Dairəsi üzrə Apellyasiya Məhkəməsinin 11 nəfərlik heyəti mayın 7-də əvvəlki qərarı ləğv edərək, quruma təxminən 12 milyon dollar vəsaitin ayrılmasına icazə verib.

Sözügedən vəsait ABŞ Qlobal Media Agentliyi (USAGM) tərəfindən dondurulmuşdu. Bu maliyyə dəstəyi RFE/RL-in cari maliyyə ilinin ikinci yarısı – aprel-sentyabr dövrü üçün nəzərdə tutulub. Məhkəmənin son qərarı, qurumun yaxın həftələrdə fəaliyyətini bərpa etməsi baxımından həyati əhəmiyyət daşıyır.

Mübahisəyə səbəb olan vəsaitin təmin olunması üçün “Azadlıq Radiosu” USAGM-ə qarşı məhkəmə iddiası qaldırmışdı. Aprelin 29-da ABŞ-nin dairə hakimi Roys Lambert RFE/RL-in xeyrinə qərar verərək bildirmişdi ki, vəsaitin ayrılması Konqresin iradəsini əks etdirir və təsdiqlənmiş büdcə sənədində açıq şəkildə göstərilib.

Lakin mayın 7-də apellyasiya məhkəməsinin üç hakimdən ibarət paneli bu qərarı müvəqqəti dayandırmışdı. Bu, “Azadlıq Radiosu”nun maliyyə gələcəyi ilə bağlı ciddi suallar doğurmuşdu. Elə həmin günün sonunda Apellyasiya Məhkəməsinin tam heyəti panelin qərarını “məhkəmənin növbəti göstərişinədək” dayandırdı və bununla da RFE/RL-in vəsait almasına imkan yaradıldı.

Qərar 7 səs lehinə, 4 səs əleyhinə olmaqla qəbul olunub. Əleyhdar hakimlərin hamısı respublikaçılar tərəfindən təyin edilmişdi. Qeyd edək ki, USAGM bu qərardan ABŞ Ali Məhkəməsinə şikayət etmək hüququnu saxlayır.

Maliyyə dəstəyinin gecikməsi səbəbindən “Azadlıq Radiosu” son aylarda ciddi çətinliklərlə üzləşib. Aprel ayından bəri əsas vəsaitsiz fəaliyyət göstərən qurum yüzlərlə əməkdaşını məzuniyyətə göndərib, frilans müqavilələrini ləğv edib və xərclərini minimuma endirib.

Ekspertlər bu qərarı medianın müstəqilliyinin və dövlət büdcəsinin qanunverici nəzarət altında qalmasının önəmli qələbəsi kimi qiymətləndirirlər.