Sosial şəbəkələrdə yayılmış görüntülər cəmiyyətdə ciddi narahatlıq yaradıb

Son günlər sosial şəbəkələrdə yayılan və bir şəxsin özünü “peyğəmbər” elan edərək insanlardan qazancın yarısını tələb etməsi geniş rezonans doğurub. Bu çıxışlar ictimaiyyətdə narazılıqla qarşılanaraq dini dəyərlərə təhqir, psixoloji manipulyasiya və potensial təhlükə kimi dəyərləndirilib.

Məsələ ilə bağlı psixiatr Azər Bağırov bildirib ki, özünü “seçilmiş” və ya “peyğəmbər” kimi təqdim edən şəxslərin əslində iki fərqli psixoloji portreti ola bilər. Onun sözlərinə görə, əgər bir insan bu cür iddiaları yalnız inanc səviyyəsində və içdən gələn bir hisslə söyləyirsə, bu hallarda manik-depressiv psixozun manik fazasından söhbət gedə bilər.

“Belə şəxslər həqiqətən də özlərinin Allah tərəfindən göndərildiyinə inanırlar. Onlar cəmiyyətə dini istiqamətdə təsir etməyə çalışır, ailə və yaxınlarına da eyni tələbləri qoyurlar. Radikal dindar davranışlar sərgiləyir, ibadətə qapanırlar. Ancaq bu insanlar adətən maddi qazanc üçün deyil, saf inanc səbəbilə belə davranırlar”, – deyə Azər Bağırov bildirib.

Digər psixiatr Azad İsazadə isə məsələyə daha sərt yanaşaraq bu tip halların çox zaman dələduzluq məqsədi daşıdığını qeyd edib.

“Bəzi ruhi xəstələrdə sayıq düşüncə nəticəsində özlərini peyğəmbər, ya da tarixi şəxsiyyətlər kimi hiss etmələri müşahidə olunur. Amma burada söhbət konkret şəkildə maddi qazanc əldə etmək məqsədi daşıyan davranışdan gedirsə, bu artıq dələduzluqdur. Belə şəxslər insanları inandıraraq onların pul və etibarından sui-istifadə edirlər”, – deyə Azad İsazadə bildirib.

Mütəxəssislər bu kimi hallara qarşı həm hüquqi, həm də psixoloji yanaşmanın vacibliyini vurğulayırlar. Sosial şəbəkə istifadəçiləri isə aidiyyəti qurumlardan bu cür halların qarşısının alınmasını və dini dəyərlərin istismarına imkan verilməməsini tələb edirlər.