Abonentlər “Azercell”dən Kütləvi Şəkildə İmtina Edir – Yeni Qaydalar Narazılıq Doğurub

Mobil rabitə operatoru “Azercell” 2025-ci il iyulun 1-dən etibarən fakturasız nömrələr (prepaid) üçün yeni aktiv qalma müddəti qaydalarının tətbiq ediləcəyini açıqlayıb. Şirkətin bu qərarı sosial şəbəkələrdə geniş rezonans doğurub və istifadəçilər arasında ciddi narazılıqlara səbəb olub.

Yeni qaydalara əsasən, fakturasız xətt istifadəçiləri müəyyən müddət ərzində balanslarını artıra və ya xidmətlərdən istifadə etmədikdə nömrələri passivləşdirilə və ləğv edilə bilər. Bu şərtləri ədalətsiz sayan çox sayda abonent sosial mediada “Azercell”dən imtina etdiklərini və digər mobil operatorlara keçəcəklərini açıqlayıb.

İstifadəçilər qiymət artımlarını və xidmət şərtlərinin dəyişməsini sərt şəkildə tənqid edərək, bu addımın onların büdcəsinə ziyan vurduğunu bildiriblər. Bəzi vətəndaşlar bu qərarı açıq şəkildə “biabırçılıq” adlandırıblar. Sosial şəbəkələrdə “Azercell-lə vidalaşırıq”, “Operator dəyişikliyinə başlayıram”, “Azercell layiqli cavabını alacaq” kimi paylaşımlar geniş yayılıb.

Hazırda “Azercell” tərəfindən məsələ ilə bağlı əlavə açıqlama verilməyib. İctimaiyyət isə şirkətdən yeni qaydaların şərtləri, tətbiqi mexanizmi və bu dəyişikliklərin zəruriliyi ilə bağlı aydın və şəffaf izahat gözləyir.