Sabunçu rayonu, Bakıxanov qəsəbəsində yerləşən 169 nömrəli tam orta məktəbdə bu ildən bütün III siniflərin günorta növbəsinə keçirilməsi valideynlərin kütləvi narazılığına səbəb olub.

Valideynlərin sözlərinə görə, məktəbin direktoru Pərvanə Əzimova dərs ilinin başlanmasına cəmi 7 iş günü qalmış, guya Elm və Təhsil Nazirliyinin göstərişinə əsaslanaraq qərar qəbul edib. Lakin valideynlərə hər hansı rəsmi sənəd təqdim olunmayıb.

Şikayətçilər bildirirlər ki:
• Məktəbin ibtidai siniflər üçün ayrıca binası var və indiyədək heç vaxt ikinci növbə tətbiq olunmayıb;
• Valideynlər övladlarını bu məktəbə qəbul edərkən direktorun “ibtidai siniflər həmişə birinci növbədə olacaq” vədi əsas seçim səbəblərindən biri olub;
• Elektron qəbul sistemi bağlandıqdan sonra belə qəfil qərarın elan olunması qanunsuz sayılır.

Valideynlərin dediyinə görə, ötən ilin sentyabrında da məktəbin 6-cı sinifləri qəfil ikinci növbəyə keçirilib, lakin onların etirazından sonra qərar ertəsi gün ləğv edilib. Amma 3-cü siniflərlə bağlı şikayətlərə hələ cavab verilməyib.

“Direktor bizimlə prinsipə düşüb, açıq şəkildə deyir ki, valideynlərin tələbinə baxmayaraq uşaqları səhər növbəsinə qaytarmayacaq. Çox valideyn işləyir, bu ani dəyişiklik övladlarımızın dərsə davamiyyətinə ciddi mane olacaq. Bu da uşaqların təhsil alma hüququnun pozulmasıdır”, – deyə valideynlər bildiriblər.