Oğuz Rayon Polis Şöbəsinin əməkdaşları tərəfindən keçirilən əməliyyat zamanı bir ailənin 4 üzvü narkotik vasitələrin satışı və kultivasiyası ittihamı ilə saxlanılıb.

Daxili İşlər Nazirliyinin Mətbuat Xidmətinin Şəki regional qrupundan verilən məlumata görə, əməliyyat zamanı əvvəllər də ağır cinayətə görə məhkum olunmuş 65 yaşlı Məmmədsaad Məmmədov, onun oğlu 34 yaşlı Orxan, həyat yoldaşı 55 yaşlı Gülnaz və gəlini Dilbər Məmmədova tutulub.

Onların Xaçmaz kəndində yaşadıqları evə baxış zamanı təxminən 3 kiloqram marixuana, 138 ədəd çətənə bitkisi və hissələri, həmçinin şüşə qablarda narkotik tərkibli bitkilərin toxumları aşkarlanıb.

İstintaqla müəyyən olunub ki, saxlanılan şəxslər çətənə kollarını bir müddət əvvəl əkərək becərib və qulluq göstəriblər. Məmmədsaad Məmmədov sifarişləri qəbul edir, narkotik vasitələrin çatdırılmasını isə həyat yoldaşı, oğlu və gəlini vasitəsilə təşkil edirdi.

Faktla bağlı cinayət işi başlanıb. Məhkəmənin qərarı ilə saxlanılanlardan üç nəfər barəsində həbs qətimkan tədbiri, Dilbər Məmmədova barəsində isə digər növdən qətimkan tədbiri seçilib. Əməliyyat-istintaq tədbirləri davam etdirilir.