Sentyabrın 23-də Dövlət İmtahan Mərkəzi (DİM) taksi minik avtomobili sürücüləri üçün imtahan keçirəcək.

DİM-in məlumatına görə, imtahanda iştirak etmək üçün 1 561 nəfər qeydiyyatdan keçib. İmtahan Bakı şəhərindəki DİM-in elektron imtahanlar korpusunda (Binəqədi rayonu, S.S. Axundov küçəsi, 50) və Gəncə regional bölməsində (Gəncə şəhəri, H. Əliyev meydanı) iki növbədə təşkil olunacaq.

İmtahan:
• 1 saat davam edəcək,
• iştirakçılar nəticələrlə həm dərhal, həm də növbəti gün DİM-in saytında tanış ola biləcəklər.

Namizədlər imtahana buraxılış vərəqəsini DİM-in saytındakı “Elektron imtahanlara buraxılış vərəqələri və nəticələrin çapı” xidmətindən əldə etməlidirlər. Buraxılış vərəqəsi və şəxsiyyət vəsiqəsi təqdim olunmadıqda imtahana buraxılış olmayacaq.

İmtahanda namizədlərə 20 test tapşırığı təqdim ediləcək. Suallar sürücülərin etik davranış qaydaları və sərnişindaşımanı tənzimləyən normativ hüquqi aktlar üzrə olacaq.
• Hər düzgün cavab 1 balla qiymətləndirilir.
• 10 və daha çox bal toplayanlar imtahanı müvəffəqiyyətlə vermiş sayılır.
• Uğur qazananlara 7 il müddətində etibarlı şəhadətnamə veriləcək.

DİM namizədlərə imtahandan əvvəl “Yaddaş kitabçası” ilə tanış olmağı tövsiyə edib.