Saxta orden, medal və müxtəlif təyinatlı vəsiqələr hazırlayaraq satan şəxslər ifşa edilib.

DİN-in Mətbuat Xidmətinin məlumatına görə, polis əməkdaşlarının keçirdiyi tədbirlərlə qanunsuz fəaliyyətlə məşğul olan:
• “Azərbaycan Vətən Müharibəsi Veteranları” İctimai Birliyinin sədri Füzuli Rzaquliyev,
• “Dədə Qorqud” Xeyriyyə Fondunun rəhbəri Eldar İsmayılov,
• “Sabitlik və İnkişaf Mərkəzi” İctimai Birliyinin sədri Rasim Məmmədov saxlanılıblar.

Aparılan axtarışlar zamanı bu təşkilatların ofislərindən:
• dövlət əhəmiyyətli xüsusi günlər və əlamətdar hadisələri əks etdirən 1 500-dən çox medal və orden,
• 421 ədəd vəsiqə,
• 60-dan artıq müxtəlif möhür,
• digər saxta sənəd və atributlar aşkar edilərək maddi sübut kimi götürülüb.

Faktla bağlı Cinayət Məcəlləsinin rəsmi sənədləri, dövlət təltiflərini, möhür və ştampları saxtalaşdırma, hazırlama, satma və ya saxta sənədlərdən istifadə etmə maddəsi ilə cinayət işi başlanıb.

Adıçəkilən şəxslər istintaqa cəlb olunublar, araşdırmalar davam etdirilir.