Yol hərəkətində təhlükəsizliyin təmin olunması istiqamətində Daxili İşlər Nazirliyinin Baş Dövlət Yol Polisi İdarəsi (BDYPİ) tərəfindən növbəti dəfə piyadalara xəbərdarlıq edilib.

Qurumdan bildirilib ki, yol hərəkətinin ən müdafiəsiz iştirakçıları olan piyadaların təhlükəsizliyinin qorunması və onların iştirakı ilə baş verən qəzalara səbəb ola biləcək halların qarşısının alınması daim diqqət mərkəzində saxlanılır. Bu məqsədlə mütəmadi nəzarət-profilaktik tədbirlər həyata keçirilir.

Bununla belə, aparılan maarifləndirmə və təbliğat işlərinə baxmayaraq, bəzi piyadalar hələ də təhlükəsizlik qaydalarına məsuliyyətsiz yanaşır. Bu cür laqeyd davranışlar bəzən həm piyadaların, həm də digər hərəkət iştirakçılarının həyatı üçün faciəvi nəticələrə səbəb olur.

Aparılmış təhlillər göstərib ki, piyadaların iştirakı ilə baş verən yol-nəqliyyat hadisələrinin əksəriyyəti piyada zolaqlarının və ya yeraltı-yerüstü keçidlərin yaxınlığında, xüsusilə də sutkanın qaranlıq vaxtında baş verir.

Baş Dövlət Yol Polisi İdarəsi bir daha bütün piyadalara müraciət edərək onları yolu yalnız müəyyən olunmuş keçidlərdən istifadə etməklə keçməyə, svetofor siqnallarına riayət etməyə, telefon və digər yayındırıcı vasitələrdən uzaq durmağa, azyaşlı uşaqlarla hərəkət zamanı diqqətli olmağa çağırıb.

Qurum vətəndaşlara xatırladır: “Bir anlıq diqqətsizlik bir ömürlük peşmançılığa səbəb ola bilər.”