Naxçıvanda 15 yaşlı uşağa qarşı törədilən təcavüz hadisəsi ilə bağlı məhkəmə prosesi davam edir.

Oktyabrın 3-də Naxçıvan Ali Məhkəməsində bu iş üzrə təqsirləndirilənlərdən biri – hərbçi Əsədov Səbuhi Səməd oğlunun məhkəmə iclası keçirilib. Prosesə hakim Fərman Abbasov sədrlik edib.

Zərərçəkənin atası Novruz Musayevin “Meydan TV”yə verdiyi məlumata görə, məhkəmə qərarı ilə Səbuhi Əsədovun cəza müddəti 1 ildən 2 ilə artırılıb.

Xatırladaq ki, 15 yaşlı yeniyetmə dörd nəfər tərəfindən təcavüzə məruz qalıb. Onlardan üçü hərbçi, biri isə mülki şəxs olub. Hadisədən sonra yeniyetmə oxuduğu məktəbdən və hazırlıq kursundan uzaqlaşdırılsa da, sonradan məktəbə bərpa edilib.

Ata bildirib ki, digər təqsirləndirilənlərdən birinə 9 ay, digərinəd 1 il, mülki şəxs Əlizadə Barışa isə 4 ildən çox azadlıqdan məhrumetmə cəzası verilib. Təqsirləndirilənlərdən biri isə sübut çatışmazlığı səbəbindən azadlığa buraxılıb.

Sentyabrın 25-də iş üzrə digər təqsirləndirilən – Pənahov Sənan Vaqif oğlunun apellyasiya iclası keçirilib və onun cəzası 9 aydan 2 ilə qaldırılıb.

Zərərçəkənin atası bildirib ki, dördüncü təqsirləndirilən – Əsədov Araz Səməd oğlu ilə bağlı məhkəmə qərarından hələlik xəbər yoxdur: “Cinayət işinə xitam verilməsi barədə sənədin surətini istədim, lakin müstəntiq bunun Hərbi Məhkəməyə göndərildiyini bildirdi. Hərbi Məhkəmə isə işin Ali Məhkəməyə göndərildiyini deyir. Sənədləri niyə gizlədirlər, bu işi niyə bağlayırlar, anlamıram,” – deyə Musayev bildirib.