Bakıda həyat yoldaşını qətlə yetirməkdə və ona qısqanclıq zəminində taksi sürücüsünü öldürməyə cəhd etməkdə təqsirləndirilən Əfqanıstan vətəndaşı Samandar Səfayinin cinayət işi üzrə məhkəmə baxışı keçirilib.

Bakı Ağır Cinayətlər Məhkəməsində hakim Nigar İmanovanın sədrliyi ilə keçirilən prosesdə təqsirləndirilən şəxsin sərbəst ifadəsi dinlənilib. Samandar Səfayi bildirib ki, Birinci Qarabağ müharibəsindən sonra Azərbaycanda məskunlaşaraq Nüşabə adlı qadınla ailə həyatı qurub və onların iki övladı var.

Təqsirləndirilən şəxs həyat yoldaşının davranışlarından şübhələndiyini, onun dediyi yerə getmədiyini bildiyini və evdə yaranmış mübahisə zamanı Nüşabə Səfərovanı qətlə yetirdiyini etiraf edib. Bundan sonra taksi sürücüsü Canmirzə Cabbarovun olduğu yerə gedərək ona divar kağızı bıçağı ilə ağır xəsarət yetirdiyini söyləyib.

Hadisə 2025-ci il iyulun 9-da Binəqədi rayonunda baş verib. Rayon Prokurorluğunda aparılan araşdırmalar nəticəsində Səfayinin qısqanclıq zəminində həyat yoldaşını qətlə yetirməsi və taksi sürücüsünü öldürməyə cəhd etməsi müəyyən edilib.

Faktla bağlı Səməndər Səfayi barəsində Cinayət Məcəlləsinin 120.2.1 (qəsdən adam öldürmə) və 29, 120.2.7 (iki və ya daha çox şəxsi öldürməyə cəhd) maddələri ilə cinayət işi başlanıb.