Tanınmış təhsil eksperti Kamran Əsədov barəsində cinayət işi başlanılıb. O, tanışı Gündüz Abbasovla birlikdə qəbul imtahanlarında qanunsuz texniki vasitələrin tətbiqi ilə bağlı ittiham olunur.

Məlumata görə, Gündüz Abbasov hazırda həbsdə saxlanılır. Kamran Əsədov barəsində isə istintaq dövrü üçün “başqa yerə getməmək haqqında” iltizam qətimkan tədbiri seçilib.

İttihamlara əsasən, K. Əsədov və G. Abbasov cinayət əlaqəsinə girərək ümumilikdə 15 imtahan iştirakçısına qanunsuz texniki vasitələr quraşdırmaqda təqsirləndirilirlər. Gizli kamera, səsötürücü funksiyalı “vip smart” telefon, nano qulaqlıq, mifi cihazları və digər qurğular əvvəlcədən hazırlanaraq Gəncə və Bakı şəhərlərində keçirilən buraxılış və qəbul imtahanlarında istifadə üçün abituriyentlərə verilib.

Texniki avadanlıqlar imtahan iştirakçılarının ayaqqabılarında gizlədilib – bunun üçün ayaqqabı altlıq hissədən kəsilib və qurğular həmin boşluğa yerləşdirilib. Abituriyentlərə imtahan zamanı tualetdə cihazı aktivləşdirərək sual vərəqinin şəklini çəkmək və qulaqcıq vasitəsilə cavabları gözləmək təlimatı verilib.

İstintaq materiallarına görə, təqsirləndirilən şəxslər göstərdikləri “xidmət” qarşılığında müxtəlif məbləğlərdə pul alıblar və əldə edilən vəsaiti aralarında bölüşüblər.

Kamran Əsədov və Gündüz Abbasova Cinayət Məcəlləsinin 302.3-cü (gizli informasiya əldə etmək üçün nəzərdə tutulmuş texniki vasitələrin qanunsuz satılması və ya satış məqsədilə əldə edilməsi) və 308.1-ci (vəzifə səlahiyyətlərindən sui-istifadə) maddələri ilə ittiham elan edilib. Hər iki maddə üzrə 3 ilədək azadlıqdan məhrumetmə cəzası nəzərdə tutulur.

Cinayət işinə Gəncə Şəhər Məhkəməsində hakim Elçin Məmmədovun sədrliyi ilə baxılır. Bu gün keçirilən hazırlıq iclasında təqsirləndirilən şəxslərə hüquq və vəzifələri izah olunub və seçilmiş qətimkan tədbirlərinin qüvvədə saxlanılması qərara alınıb. İş üzrə əsas məhkəmə iclası dekabrın 15-nə təyin edilib.

Qeyd edək ki, cinayət işinin başlanmasına səbəb Dövlət İmtahan Mərkəzinin Dövlət Təhlükəsizliyi Xidmətinə müraciəti olub. DTX tərəfindən təqdim edilən materiallar əsasında Baş Prokuror yanında Korrupsiyaya qarşı Mübarizə Baş İdarəsində aparılan istintaq nəticəsində bu iş üzrə daha bir neçə nəfərin də məsuliyyətə cəlb olunduğu bildirilir.