Bakının Sabunçu rayonunun Zabrat qəsəbəsində Nəzirxan Ağaxanovu oğurlayaraq ona qarşı zorakılıq əməlləri törətməkdə təqsirləndirilən dəstə üzvlərindən biri – Kamran Rzayev barəsində məhkəmə prosesi yekunlaşıb.

Bakı Ağır Cinayətlər Məhkəməsində keçirilən iclasda hökm oxunub. Hökmə əsasən, Kamran Rzayev 10 il müddətinə azadlıqdan məhrum edilib.

Qeyd edək ki, cinayət işi üzrə dəstənin digər üzvləri – Səlim Əliyev, Murad Rzayev, Şücaət Rzayev, Samir Hüseynov, Əhməd Əzizov, Müştəba Əliyev və onun oğlu Təbriz Əliyev barəsində materiallar ayrıca icraata ayrılıb.

İstintaqla müəyyən edilib ki, Zabrat qəsəbəsinin sakini Nəzirxan Ağaxanov “TikTok” sosial şəbəkəsində kriminal aləmdə “Rövşən Lənkəranski” kimi tanınan mərhum Rövşən Caniyev barədə xoşagəlməz ifadələrin yer aldığı video paylaşıb. Bundan sonra həmin paylaşımları görən bir qrup şəxs onun “cəzalandırılması” barədə qərar qəbul edib.

Məlumata görə, Nəzirxan Ağaxanov “Qazel” markalı avtomobilin yük yerinə yerləşdirilib, əlləri və gözləri yapışqan lentlə bağlanıb, daha sonra toyuq hinində saxlanılıb. Ardınca təqsirləndirilən şəxslər onun üzərinə əvvəlcədən gətirdikləri qırmızı rəngli gəlinlik paltarını geyindirərək paylaşdığı videoya görə üzr istəməsini tələb ediblər. Çəkilən video sonradan sosial şəbəkələrdə yayılıb.

Polis əməkdaşlarının keçirdiyi əməliyyat-axtarış tədbirləri nəticəsində şübhəli şəxslər müəyyən edilərək saxlanılıb. İş üzrə təqsirləndirilən şəxslərdən birinin 2007-ci, digərinin isə 2008-ci il təvəllüdlü olduğu bildirilir.