Azərbaycan Respublikası Audiovizual Şurasının onlayn iclası keçirilib. İclasda “MTV” televiziya kanalının efirində baş vermiş pozuntu halı müzakirə olunub. Bu barədə Audiovizual Şura məlumat yayıb.

Məlumata görə, 28 noyabr 2025-ci il tarixində saat 10:04–11:54 aralığında yayımlanan “Xoş sabah” proqramında ailə münasibətləri, qadın–kişi əlaqələri, müasir ailələrə təsir edən sosial amillər və rolların dəyişməsi mövzuları müzakirə edilib. Proqram zamanı qonaqlardan birinin boşanmanı “inkişaf” kimi təqdim edən fikirlər səsləndirdiyi, digər qonağın isə buna cavab olaraq boşanmanı “əxlaqsızlıq” kimi xarakterizə etdiyi bildirilib.

Audiovizual Şuranın monitorinq mütəxəssisləri qeyd olunan qarşılıqlı ifadələri, eləcə də proqram aparıcısının bu fikirlərə lazımi redaksiya müdaxiləsi etməməsini qanunvericilik pozuntusu kimi qiymətləndirib. Aparılmış araşdırma və hüquqi təhlil nəticəsində pozuntu faktı təsbit olunub.

İclasda Şura üzvləri bildiriblər ki, boşanma mövzusunun müzakirəsi mümkündür, lakin onun “inkişaf” kimi təqdim edilməsi, yaxud əksinə, əxlaqsızlıqla eyniləşdirilməsi qəbuledilməzdir. Vurğulanıb ki, Azərbaycan Respublikası Konstitusiyasının 17-ci maddəsinə əsasən ailə cəmiyyətin əsas özəyi hesab olunur və dövlətin himayəsindədir. Ailə Məcəlləsində boşanma hüququ tanınsa da, ailənin qorunması prioritet kimi müəyyən edilib.

Şura üzvləri “boşanmaq inkişafdır” ifadəsini “Media haqqında” Qanunun, eləcə də “Uşaqların zərərli informasiyadan qorunması haqqında” Qanunun məqsəd və ruhuna zidd mesaj kimi qiymətləndiriblər. Nəticədə qeyd olunan yayım ilə bağlı “MTV” kanalına ciddi xəbərdarlıq olunub.

Audiovizual Şura yayımçıları bir daha qanunvericiliyin tələblərinə ciddi əməl etməyə, redaksiya nəzarətini gücləndirməyə və ailə, uşaq, nikah kimi həssas mövzuların işıqlandırılmasında diqqətli olmağa çağırıb.