**Milli Məclis**in plenar iclasında Azərbaycan Respublikasının Əmək Məcəlləsi və **Təhsil haqqında qanun**a təklif olunan dəyişikliklər müzakirə olunub.

Müzakirələr zamanı deputat Vüqar Bayramov bildirib ki, Əmək Məcəlləsinin 67-2-ci maddəsinə təklif edilən dəyişikliklərə əsasən, incəsənət məktəblərində çalışan təhsilverənlər də sertifikatlaşdırma imtahanlarına cəlb olunacaqlar.

Onun sözlərinə görə, həmin maddəyə əsasən 60 və daha yuxarı yaşda olan şəxslərin sertifikatlaşdırmada iştirakı könüllüdür, eyni zamanda azı üç dəfə sertifikatlaşdırmadan keçmiş şəxslər bu prosesə cəlb edilmir.

Deputat təklif edib ki, sertifikatlaşdırmadan azad edilən şəxslərin siyahısı genişləndirilsin. O hesab edir ki, incəsənət sahəsində beynəlxalq müsabiqə qalibləri də sertifikatlaşdırmadan azad olunmalıdır.

Vüqar Bayramov həmçinin bildirib ki, ən azı iki dəfə sertifikatlaşdırmadan uğurla keçən müəllimlərin yenidən bu imtahana cəlb olunmaması məqsədəuyğun olar.

Deputat maaş artımı mexanizmi ilə bağlı da dəyişiklik təklif edib. Onun sözlərinə görə, hazırda imtahanda 30–50 bal toplayanların maaşı 10 faiz, 51–60 bal toplayanların maaşı isə 35 faiz artırılır. O təklif edib ki, imtahanda 80 faiz və daha yüksək nəticə göstərən müəllimlərin maaşları birbaşa 35 faiz artırılsın.

Məsələ ilə bağlı Səadət Yusifova bildirib ki, bu meyarların bir qismi artıq işə qəbul qaydalarında nəzərdə tutulur.

**Azərbaycan Respublikasının Mədəniyyət Nazirliyi**nin nazir müavini qeyd edib ki, belə dəyişikliklərin qanunvericiliyə daxil edilməsi üçün Elm və Təhsil Nazirliyi və Əmək və Əhalinin Sosial Müdafiəsi Nazirliyi ilə razılaşdırma prosedurlarından keçməsi tələb olunur.