Bakıda övladını birinci sinifdə oxutmaq üçün yaradılan elektron sistemdən qeydiyyatdan keçirmək istəyən valideyn problemlə üzləşib.

“Report” xəbər verir ki, bununla bağlı sosial şəbəkədə paylaşım edən valideyn Babək Həmidov bir neçə gün bundan əvvəl www.mektebeqebul.edu.az sistemi vasitəsilə elektron qaydada qeydiyyatdan keçirmək istəsə də, sistemdə müəyyən texniki problemlərin olduğu əsas gətirilərək müraciətin daha sonra edilməsi məsləhət görülüb.

O qeyd edib ki, övladı O.Həmidli Bakı şəhəri İ.Hacıyev adına “Tərəqqi” texniki-humanitar liseyi üçün iki imtahanı uğurla keçib və müəllim seçimi etmək istəyib:

“Müəllim seçimi üçün səhər saat 10:00-dan gözləmədə idim. Deməli, saat 10:40-dan sayt “Profilaktik tədbirlər” adı ilə bağlandı. Saat 11:02-də sayt aktiv oldu, saat 11:03-də sayta daxil ola bildim. Lakin seçmək istədiyimiz müəllimin sinfi artıq dolmuşdu. Yerlərin satılması istisna edilmir.

Bəs, mən buna təəccübləndimmi? Əlbəttə ki, Yox! Çünki, bu kimi elektron hoqqabazlıq, qanunsuzluqlar daha əvvəl də oldu. Saytın qaynar xətti həmişəlik məşğuldur. Bu məsələnin həlli ilə bağlı dostlara da zəng edə, xahiş edə, əvvəlcədən müəllim seçimi işimi də həll edə bilərdim. Lakin etmədin, çünki bu qanunsuz və başqa uşaqların haqqına girə bilməzdim.

Saytın işləmədiyi "Profilaktik tədbir" müddətində hansısa hoqqabazlar 6 yaşlı uşaqların təhsil haqqını indidən pozmağa başladı. Bu məsələyə dair Təhsil Nazirliyindən əsaslı və ətraflı izah, açıqlama tələb edirəm. Problem aradan qalxmayacağı təqdirdə Təhsil Nazirliyini məhkəməyə verəcəyəm”.

İ.Hacıyev adına "Tərəqqi" texniki-humanitar liseyindən isə valideynin paylaşımına cavab olaraq O.Həmidlinin biliyinin Bakı Şəhəri üzrə Təhsil İdarəsinin keçirdiyi müsahibə və liseyin keçirdiyi müsabiqə zamanı obyektiv olaraq qiymətləndirildiyi və liseyə qəbul olunduğu təsdiqlənib:

“Liseyə qəbul olunan 90 şagird üçün hər birində 30 şagird olmaqla 3 sinif açılıb. Müəllim seçimi onlayn aktiv olan anda sizin kimi digər 89 valideyn də Xumara Ağacanovanı seçmək hüququndan istifadə edib və 30 yer hamısı tutulub. Yəqin ki, həmin valideynlərin bəzisi ilə sizin də əlaqəniz var. Əgər əlinizdə hər hansı bir neqativ hal varsa, buyurun yaza bilərsiniz. Onlayn seçimə lisey də daxil olmaqla heç kim müdaxilə edə bilməz. Yalnız hər bir valideyn şəxsi kabinetinə daxil olub, seçim edə bilir. Siz digər iki sinfi seçə bilərsiniz, yəni övladınızın “Tərəqqi” liseyinə daxil olmasını heç kim ləğv etməyib”.

Həmçinin qeyd olunub ki, saat 11:05-də Xumara Ağacanova adlı müəllimin sinfi tam dolmuş vəziyyətdə olub.