ABŞ-nin səlahiyyət müddəti başa çatmış Azərbaycandakı səfiri Mark Libbi ilə görüşmək istəyən şəxs həbs edilib.

1980-cı il təvəllüdlü Lənkəran rayon sakini K.H. icazəsi olmadan ABŞ-nin Azərbaycandakı səfirliyinin həyətinə daxil olmağa cəhd edib.

Polis əməkdaşları K.H.-ya yaxınlaşıb və ondan səfirliyin ərazisindən çıxmağı tələb ediblər. Lakin K.H. buna əməl etməyib və bu addımı saxlanılmasına səbəb olub.

Barəsində İnzibati Xətalar Məcəlləsinin 510 və 535.1-ci maddələri ilə protokol tərtib edilib və iş məhkəməyə göndərilib.

K.H. məhkəmədə ifadəsində bildirib ki, ABŞ-nin Azərbaycandakı səfirliyinin həyətinə daxil olmağa cəhd etməsinin səbəbi Amerikaya getmək istəyi olub: “Səfirə mənə Amerikaya getməyə kömək etməsini istəyəcəkdim”.

Məhkəmənin qərarı ilə, K.H 15 gün müddətinə inzibati qaydada həbs edilib.