Belarusda 52 siyasi məhbus azadlığa çıxarılıb. Onların arasında “Azadlıq Radiosu”nun Belarus xidməti ilə əməkdaşlıq edən jurnalist İqor Losik də var.

Losik 2020-ci ilin iyun ayında prezident seçkilərinə bir neçə həftə qalmış həbs olunmuş, 2021-ci ildə “ictimai asayişin pozulması” və “kütləvi iğtişaşların təşkili” ittihamları ilə 15 il müddətinə ciddi rejimli koloniyada azadlıqdan məhrum edilmişdi. Onun həyat yoldaşı Darya Losik də saxlanılmış və iki il həbs cəzası almışdı, daha sonra azad edilmişdi.

“Beş ildən artıq haqsız həbsdən sonra jurnalist İqor Losik azadlığa çıxdı. Onun ədalətsiz və ağrılı sınaqları nəhayət ki, başa çatdı”, – “Azadlıq Radiosu”nun prezidenti Stiv Kapus bildirib.

Azadlığa buraxılma ABŞ və Litva hökumətlərinin dəstəyi və diplomatik danışıqlar çərçivəsində həyata keçirilib.