Həbsdə olan “Meydan TV” jurnalisti Aytac Tapdığın (Əhmədova) Bakı Apellyasiya Məhkəməsində fiziki zorakılığa məruz qaldığı bildirilir.

Bu barədə heyvan haqları fəalı Kamran Məmmədli sosial mediada məlumat paylaşıb. Onun sözlərinə görə, sentyabrın 26-da jurnalist məhkəməyə gətirilərkən həmkarlarını görüb səslənib. Bundan sonra konvoy rəisi Cəmil Hüseynov onu koridorda zorakılıqla itələyərək saxlanma otağına aparıb və orada kişi məhbusların arasında sərt şəkildə itələyib.

Məhkəmə iclası Aytac Tapdıq və Kamran Məmmədlinin nikaha girmək barədə şikayəti ilə bağlı olub. Birinci instansiya məhkəməsi onların müraciətini təmin etməsə də, Apellyasiya Məhkəməsi şikayəti qismən təmin edərək işi Xətai Rayon Məhkəməsinə geri göndərib.

Xatırladaq ki, 2024-cü il dekabrın 6-da “Meydan TV işi” üzrə saytın Azərbaycan nümayəndəliyinin rəhbəri Aynur Elgünəş, jurnalistlər Ramin Deko, Aysel Umudova, Aytac Tapdıq, Xəyalə Ağayeva, Natiq Cavadlı saxlanılıblar. Daha sonra “Arqument.az” saytının baş redaktoru Şəmşad Ağa (Ağayev), jurnalistlər Nurlan Libre (Qəhrəmanlı), Fatimə Mövlamlı, Ülviyyə Əli (Quliyeva) və fotoqraf Əhməd Muxtar da həbs edilib.

Həbs olunan jurnalistlərin hamısı özünü təqsirli bilmir.