Xaricdə yaşayan jurnalist Sevinc Osmanqızı (Mirzəyeva Sevinc Osman qızı) barəsində cinayət işi başlanıb. Bu barədə məlumatı Baş Prokurorluq İctimai Televiziya vasitəsilə yayıb.

Məlumata görə, Sevinc Osmanqızı Azərbaycan Respublikası Cinayət Məcəlləsinin 282.2-ci maddəsi (dövlət əleyhinə yönələn açıq çağırışlar etməyə təhrik etmə — eyni əməllər təkrar və ya bir qrup şəxs tərəfindən törədildikdə) ilə ittiham olunur.

Baş Prokurorluq bildirir ki, o, istintaq orqanından qaçaraq ölkə hüdudlarından kənarda gizləndiyi üçün barəsində axtarış elan edilib. Bakı şəhəri Binəqədi Rayon Məhkəməsinin qərarı ilə jurnalist haqqında qiyabi həbs qətimkan tədbiri seçilib.

İstintaq orqanı Sevinc Osmanqızına şəxsiyyətini təsdiq edən sənədlə birlikdə 20 noyabr 2025-ci il, saat 16:00-da Bakı şəhəri, Binəqədi rayonu, Süleyman Sani Axundov küçəsi 160 ünvanında yerləşən Baş Prokurorluğun İstintaq Baş İdarəsinə gəlməsi barədə çağırış göndərib.

Qeyd olunub ki, çağırışa gəlmədiyi təqdirdə jurnalist barəsində qiyabi icraatın aparılması, eləcə də qiyabi hökm və ya digər yekun məhkəmə qərarının çıxarılması mümkündür.