11 saylı Cəzaçəkmə Müəssisəsində saxlanılan jurnalist Rəşad Ramazanovun müəssisə rəhbərliyi tərəfindən döyüldüyü və ölümlə hədələndiyi iddia olunur.

Bu barədə jurnalistin özü “Qəzetçi”yə ünvanladığı məktubda məlumat verib.

Rəşad Ramazanovun sözlərinə görə, o, cəzaçəkmə müəssisəsinin rəisi Şakir Qəniyev tərəfindən fiziki zorakılığa məruz qalıb. Jurnalist bildirir ki, hazırda şiddətli ağrılar keçirir və səhhəti ciddi narahatlıq doğurur.

“Şiddətli ağrılarım var. O qədər ağrıyıram ki, inildəyirəm və yanımda qalan məhkumlar səsimdən narahat olurlar. Rəis isə mənə deyir ki, Qənimət Zahidə Azərbaycan Saatı internet kanalına verdiyim müsahibədə üç məhkumun öldürüldüyünü demisən, elə etmə ki, dördüncüsü sən olasan”, – deyə Ramazanov məktubunda qeyd edib.

Jurnalist vurğulayıb ki, Şakir Qəniyevin zorakı davranışları yalnız siyasi məhbuslara qarşı deyil. Onun sözlərinə görə, müəssisə rəhbəri digər məhbusları da döyür, onları təhqir edir və ləyaqətlərini alçaldır.

Rəşad Ramazanov hesab edir ki, baş verənlərə görə Penitensiar Xidmətin rəisi Mirsaleh Seyidov və ədliyyə naziri Fərid Əhmədov da məsuliyyət daşıyır. O xatırladıb ki, Fərid Əhmədov dəfələrlə məhkumların təhqir edilməsi və onlara işgəncə verilməsinin cinayət tərkibli əməl olduğunu bəyan edib.

“Lakin Şakir Qəniyevin hələ də vəzifəsinin icrasında qalması bu bəyanatların reallıqla uzlaşmadığını göstərir”, – deyə jurnalist bildirib.

Ramazanovun ailəsi isə jurnalistin maddi vəziyyətinin ağır olduğunu və bu səbəbdən ona vəkil tuta bilmədiklərini açıqlayıb. Onun döyüldükdən sonra tibbi müayinədən keçirilib-keçirilmədiyi barədə rəsmi məlumat əldə etmək mümkün olmayıb.

Məsələ ilə bağlı Penitensiar Xidmətin və Ədliyyə Nazirliyinin mövqeyi hələlik açıqlanmayıb.