Gürcüstanın keçmiş prezidenti Giorgi Marqvelaşvili bu gün Qori Hərbi Hospitalında eks-prezident Mixeil Saakaşvili ilə görüşəcək.
Gürcü mediası xəbər verir ki, keçmiş prezidentlər arasında görüş saat 12:00-a planlaşdırılır.
Məlumata əsasən, Giorgi Marqvelaşvili ilə Mixeil Saakaşvili arasında müzakirə ediləcək əsas məsələlərdən biri Prezident Salome Zurabişvilinin təşəbbüsü ilə hakimiyyətlə müxalifət arasında milli razılıq prosesi olacaq.
Xatırladaq ki, Giorgi Marqvelaşvili dekabrın 20-də məhkum Mixeil Saakaşvili ilə görüşmək üçün Penitensiar Xidmətə müraciət etmişdi.
Yeri gəlmişkən, Mixail Saakaşvilinin külli miqdarda pul mənimsənilməsi ilə bağlı bu gün məhkəməsi keçiriləcək.
Məhkəmə Tbilisi Şəhər Məhkəməsində saat 11:00-da başlayacaq.
Eks-prezidentin vəkili Beka Basilayanın sözlərinə görə, M.aakaşvilinin məhkəmə iclasında iştirak etməsi onun səhhətindən asılıdır.
Məlumat üçün bildirək ki, Xüsusi Dövlət Mühafizə Xidmətinin keçmiş rəhbəri Teymuraz Canaşiya da Mixail Saakaşvili ilə birgə vəsaitlərin mənimsənilməsi işində ittiham olunur. Prokurorluq təqsirləndirilən şəxsləri külli miqdarda büdcə pulunu - 9 milyon lari mənimsəməkdə ittiham edir.