Mayın 13-də ABŞ-ın sabiq prezidenti Donald Trampın Səudiyyə Ərəbistanına səfəri çərçivəsində Ər-Riyadla 142 milyard dollar dəyərində silah sazişi imzalanıb. Səudiyyə Ərəbistanının vəliəhdi Məhəmməd bin Salmanla Kral Sarayında keçirilən imzalanma mərasimində tərəflər bu razılaşmanın müdafiə sahəsində tarixi əhəmiyyət daşıdığını bildiriblər.

Ağ evin yaydığı açıqlamada qeyd olunub ki, bu sənəd ABŞ-ın müdafiə sənayesi üzrə indiyədək imzaladığı “ən böyük əməkdaşlıq sazişi” kimi qiymətləndirilir. “Reuters” agentliyi vurğulayır ki, müqavilə ABŞ-ın ondan çox hərbi şirkətini əhatə edir və havadan müdafiə, raket sistemləri, hərbi-hava qüvvələri, kosmos texnologiyaları, dəniz təhlükəsizliyi və rabitə sahələrini əhatə edir.

Tramp administrasiyası bu razılaşmanı ABŞ-Səudiyyə münasibətlərinin strateji tərəfdaşlıq səviyyəsinə çatmasının göstəricisi kimi təqdim edib. “Təsdiq olunmuş paket ikitərəfli tərəfdaşlığımızı gücləndirmək öhdəliyimizin bariz nümayişidir”, – deyə bəyanatda bildirilib.

Tramp, səfəri zamanı şahzadə Məhəmməd bin Salmanı “inanılmaz insan” adlandıraraq, ABŞ ilə Səudiyyə Ərəbistanı arasındakı əlaqələrin “həmişəkindən daha güclü” olduğunu vurğulayıb. Onu səfərdə “Tesla” və “SpaceX” şirkətlərinin rəhbəri İlon Mask da daxil olmaqla bir sıra nüfuzlu iş adamları müşayiət edib.

Trampın dördgünlük Yaxın Şərq turnesinə Qətər və Birləşmiş Ərəb Əmirliklərinə səfərlər də daxildir.