Litva hökuməti Gürcüstanın diplomatları və dövlət məmurları üçün vizasız rejimi rəsmi olaraq ləğv edib. Qərar, Avropa İttifaqı Şurasının 2025-ci ilin yanvarında qəbul etdiyi və Gürcüstan rəsmilərinə qarşı viza rejiminin sərtləşdirilməsini nəzərdə tutan sənədə əsaslanır.

Yeni qaydalara görə, artıq Gürcüstanın diplomatik pasport sahibləri və dövlət məmurları, eləcə də onların ailə üzvləri Litvaya qısamüddətli səfərlər üçün viza almağa məcbur olacaqlar. Həmçinin bu şəxslər uzunmüddətli vizaların verilməsində sadələşdirilmiş prosedurlardan istifadə edə bilməyəcəklər.

Litvanın bu addımı Gürcüstan hökumətinin 2024-cü ildə Avropa İttifaqına inteqrasiya prosesindən geri çəkilməsi və ölkədə baş verən kütləvi etirazlara qarşı tətbiq edilən repressiyalar fonunda atılıb. Baltikyanı ölkələr – Litva, Latviya və Estoniya – Gürcüstan hakimiyyətinə qarşı sanksiyalar tətbiq edən ilk dövlətlər arasında yer alıb.

Sanksiyalar çərçivəsində “Gürcü Arzusu” partiyasının qurucusu Bidzina İvanişvili və ölkənin daxili işlər naziri Vaxtanq Qomelauri kimi yüksək vəzifəli şəxslərin Avropa İttifaqına daxil olması qadağan olunub.

Estoniya da Litva ilə paralel şəkildə Gürcüstanın diplomat və dövlət məmurlarına qarşı vizasız rejimi dayandırıb. Estoniyanın xarici işlər naziri Marqus Tsahkna bu addımın beynəlxalq ictimaiyyətin, o cümlədən Avropa İttifaqının, Gürcüstanda dinc etirazçılara və jurnalistlərə qarşı yönəlmiş təzyiqlərə qarşı dözümsüzlüyünü ifadə etdiyini bildirib.