İran ABŞ ilə nüvə proqramına dair danışıqlarda kompromislərə hazır olduğunu bəyan edib. Bu barədə İran Xarici İşlər Nazirliyinin rəsmi nümayəndəsi İsmayıl Bəqayi CNN telekanalına müsahibəsində məlumat verib.

Bəqayi qeyd edib ki, əgər danışıqların məqsədi İranın nüvə proqramı çərçivəsində silah hazırlamayacağına dair zəmanətlər əldə etməkdirsə, bu istiqamətdə razılaşma mümkündür: “Düşünürəm ki, biz bu məqsədə kifayət qədər asanlıqla nail ola bilərik”.

Lakin o, vurğulayıb ki, İranın zənginləşdirilmiş uran istehsalı və dinc atom enerjisindən istifadə hüququ danışıqlar predmeti ola bilməz: “Əgər ABŞ-ın niyyəti İran xalqını dinc nüvə enerjisi hüququndan məhrum etməkdirsə, bu, danışıqlar prosesinə ciddi zərbə vuracaq və bütövlükdə prosesi şübhə altına alacaq”.

Rəsmi Tehran əvvəllər də bildirib ki, nüvə proqramı yalnız sülh məqsədləri daşıyır və beynəlxalq öhdəliklər çərçivəsində həyata keçirilir. İran tərəfi ABŞ və digər Qərb ölkələri ilə qarşılıqlı etimad əsasında kompromisə açıq olduğunu bəyan etsə də, milli maraqlardan kənara çıxmaq niyyətində olmadığını bir daha xatırladıb.