ABŞ-ın Kaliforniya ştatının ən böyük şəhəri olan Los-Anceles son günlər kəskin ictimai-siyasi gərginliyin episentrinə çevrilib. Şəhərdə federal immiqrasiya reydlərinə qarşı keçirilən etiraz aksiyaları artıq üçüncü gündür ki, davam edir və daha genişmiqyaslı qarşıdurmalara səbəb olub.

Etirazların əsas səbəbi ABŞ prezidenti Donald Trampın sərt immiqrasiya siyasəti və federal miqrasiya agentliklərinin şəhərdə həyata keçirdiyi kütləvi reydlərdir. Aksiyalar ilk olaraq sülh şəraitində başlasa da, Trampın etirazlara cavab olaraq 2,000 nəfərlik Milli Qvardiya birləşməsini şəhərə yeritməsi vəziyyəti daha da gərginləşdirib.

Bu addım ciddi siyasi və hüquqi mübahisələrə səbəb olub. Belə ki, Tramp Milli Qvardiyanın yerləşdirilməsi ilə bağlı Kaliforniya ştatının rəhbərliyi ilə razılığa gəlmədən bu qərarı verib. Bu isə 1965-ci ildən bəri ABŞ-da bir prezidentin ilk dəfə ştat qubernatorunun razılığı olmadan ordu yerləşdirməsi kimi tarixə düşüb.

Qərarın ardınca etirazçılar daha da radikallaşıb. Minlərlə insan şəhərin mərkəzi küçələrinə toplaşıb, Meksika bayraqları dalğalandıraraq əsas magistral yolları bağlayıblar. Bəzi etirazçılar isə avtomat rejimdə hərəkət edən avtopilotlu nəqliyyat vasitələrini yandıraraq aksiya formasını zorakı üsullarla davam etdiriblər.

Hüquq-mühafizə orqanları və ordu vəziyyəti nəzarət altına almaq üçün gözyaşardıcı qaz, rezin güllələr və səs qumbaralarından istifadə edib. Polis onlarla etirazçını saxlayıb. Saxlanılanlar arasında hüquq-mühafizə orqanlarına molotov kokteyli atan şəxslərin də olduğu bildirilir.

Prezident Trampın qərarı Kaliforniya ştatının rəhbərliyi ilə ciddi fikir ayrılığına səbəb olub. Ştatın Demokratlar Partiyasından olan qubernatoru Qavin Nyusam, açıqlamasında qoşun yeridilməsini tənqid edərək, bunun gərginliyi daha da artırdığını bildirib:

“Biz bu böhranı dialoq və yerli resurslarla həll edə bilərdik. Federal qoşunların şəhərə yeridilməsi isə insanların qorxularını artırdı, narazılığı daha da dərinləşdirdi.”

Qeyd edək ki, Los-Anceles ABŞ-da immiqrantların ən sıx yaşadığı şəhərlərdən biridir və burada qeyri-leqal miqrantların sayı da yüksəkdir. Tramp administrasiyasının sərt siyasəti və reydləri uzun müddətdir ki, yerli əhali və hüquq müdafiəçiləri tərəfindən tənqid olunur.

Hazırda şəhərdə fövqəladə vəziyyət elan edilməsə də, təhlükəsizlik tədbirləri gücləndirilib. Etirazların hansı istiqamətdə inkişaf edəcəyi və federal hökumətlə ştat rəhbərliyi arasında yaranan gərginliyin necə nəticələnəcəyi diqqətlə izlənilir. ABŞ mediası və beynəlxalq təşkilatlar isə baş verən hadisələri insan hüquqları və federal idarəçilik baxımından analiz etməkdədir.

Foto.info.az hadisələrin inkişafını izləməyə davam edəcək.